नेपालमा पहिलो पटक दर्ता भयो समलिंगीको विवाह

लमजुङ- नेपालमा पहिलो पटक समलिंगीको विवाह दर्ता भएको छ। लमजुङ दोर्दी गाउँपालिका-२ का रामबहादुर गुरूङ र नवलपरासी कावासेती नगरपालिका-८ का सुरेन्द्र पाण्डेबीचको विवाह दर्ता भएको हो।

दोर्दी गाउँपालिका अध्यक्ष युवराज अधिकारीले समलिंगी विवाह दर्ता गरिएको जानकारी गराएका हुन्। यसअघि नेपालमा समलिंगी विवाह दर्ता गरिएको थिएन।

समलिंगी विवाह दर्ता गर्न मिल्ने वा नमिल्ने विषयमा राय माग गर्दै पिंकी गुरूङ भन्ने संजिव गुरूङसमेतले सर्वोच्च अदालतमा रिट दायर गरेका थिए। उक्त रिटमा सर्वोच्चले समलिंगी विवाह दर्ता गरी अस्थायी अभिलेख राख्न अन्तरिम आदेश जारी गरेको थियो।

राष्ट्रिय पञ्जिकरण विभागले पनि गाउँपालिकालाई उक्त आदेश अनुसार विवाह दर्ता गर्न पत्र लेखेको थियो। सर्वोच्चको आदेश र विभागको समेत पत्रका आधारमा दोर्दीले समलिंगी विवाह दर्ता गरेको हो।

रामबहादुर तेस्रोलिंगी समुदायका हुन् भने सुरेन्द्र समलिंगी हुन्। उनीहरुले ६ वर्ष अगाडि विवाह गरेका थिए।