टिकटक बन्दप्रति प्रधानमन्त्रीको ब्रिफिङ, एनसेल सेयरबारे भने- अध्ययन गर्न भनेको छु

काठमाडौँ-  प्रधानमन्त्री पुष्पकमल दाहाल ‘प्रचण्ड’ले टिकटक बन्द गर्नुको कारणबारे सम्पादकहरुलाई ब्रिफिङ गरेका छन्। सिंहदबारमा सोमबार सम्पादकहरूसँगको भेटमा प्रधानमन्त्रीले ब्रिफिङ सुनाएका हुन्।

‘मेरै घरमा नातिनातिनाले जतिखेर नि टिकटक हेर्ने, अनि राति उठेर पनि टिकटक हेरेर दिक्कवाक्क लगाएका थिए। मैले कुरा सुन्दा अरूको पनि त्यस्तै हालत रहेछ,’ उनको भनाइ थियो।

प्रमुख दलहरूको बैठकमा प्राय: सधैं सबै नेताहरूले टिकटकले गर्दा समाजमा धेरै समस्या र विकृति आएको भन्दै यसलाई बन्द गर्नुपर्ने सुझाउँदै आएको प्रधानमन्त्रीको जिकिर थियो।

‘बैठक बस्यो कि प्रमुख प्रतिपक्षी दलको नेता केपी ओलीजीले त किन ढिलो गरेको टिकटक बन्द गर्न? देश त यसले खत्तम गर्न लाग्यो भनेको भन्यै गर्नुभयो’, प्रधानमन्त्रीले भने। सबभन्दा ठूलो पार्टीको सभापति शेरबहादुर देउवाले पनि टिकटकले समाजलाई असर गरेको भन्दै यसलाई बन्द गर्न ढिलो गर्न नहुने सुझाएको प्रधानमन्त्री प्रचण्डको भनाइ थियो।

‘सबै नेताहरूबाट त्यस्तो सुझाव आएपछि र मैले आफ्नै घरमा पनि समस्या देखेपछि हामीले टिकटक बन्द गर्ने निर्णय गरेका हौं,’ उनले भने।

भारत र चीन दुवै मुलुकमा टिकटक प्रतिबन्ध भएको पनि उनको भनाइ थियो।

यस्तै एनसेलको शेयरबिक्रीका सम्बन्धमा पनि प्रधानमन्‍त्री पुष्पकमल दाहाल ‘प्रचण्डले चासो व्यक्त गरेका थिए। सेयर किनबेचमा कानुन पालना भएनभएको र त्यसबाट राजस्वमा पर्ने असरका विषयमा पनि अध्ययन गर्न निर्देशन दिएको उनको भनाइ थियो।

‘प्रधानमन्‍त्रीले यस सम्बन्धमा प्रचलित कानुनी प्रावधानको पालना भए नभएको, सेयर बिक्री वितरण गर्दा प्रचलित विधि र प्रक्रिया पालना भए नभएको एवं यसबाट नेपाल नेपालको दूरसञ्‍चार क्षेत्र र विदेशी लगानीमा पर्ने असर तथा नेपाल सरकारको राजस्वलगायतका विषयमा पर्ने प्रभावका बारेमा सम्बन्धित निकायलाई शीघ्र अध्ययन गर्न निर्देशन दिनुभएको छ,’ बैठकपछि प्रधानमन्त्रीको सचिवालयले जानकारी दिएको छ।

‘प्रचण्ड’ले धर्मनिरपेक्षताबारे मुलुकका प्रमुख शक्तिहरूबीच कुनै मतभेद नरहेकोसमेत जिकिर गरेका छन्। सोचविचार गरेरै संविधानमा सनातनदेखि चलिआएको धर्मको पनि रक्षा गर्ने र राज्य धर्महरूबीच निरपेक्ष रहे भनेर धर्मनिरपेक्षता राखेको बताएका उनले भारतलाई नै हिन्दू राष्ट्र बनाउन सल्लाह दिने गरेको समेत जिकिर गरेका थिए।