सर्वोच्चको न्यायाधीशमा प्रस्तावित ६ जनाको सुनुवाई मंसिर २९ मा

काठमाडौँ- संसदीय सुनुवाइ समितिले सर्वोच्च अदालतको न्यायाधीशरूमा प्रस्तावितहरूको सुनुवाइ मंसिर २९ गते गर्ने भएको छ। प्रतिनिधिसभाका सचिव पदमप्रसाद पाण्डेयका अनुसार प्रस्तावित न्यायाधीशहरूको सुनुवाइ मंसिर २९ गते गर्ने निर्णय भएको हो।

समितिले प्रस्तावितहरूविरुद्ध उजुरी दिएका व्यक्तिसँग छलफल सकेको छ। प्रस्तावित ६ जना न्यायाधीशविरुद्ध १० जना व्यक्तिले उजुरी दिएका थिए।

बैठकमा उजुरीकर्ता पुष्पप्रसाद गुरागाईं, चिरञ्जीवीभक्त पौडेल, प्रेमप्रसाद साह, युवराज चापागाईं, प्रवीण खनाललगायत उपस्थित थिए। त्यसक्रममा उजुरीकर्ताले आफ्नो उजुरी पुष्ट्याइँका सन्दर्भमा विभिन्न प्रमाणसहित दलिल पेस गरेका थिए।

न्यायपरिषद्ले उच्च अदालतका चार न्यायाधीश र वरिष्ठ अधिवक्ता दुई जनालाई सर्वाेच्च अदालतको न्यायाधीशका लागि प्रस्ताव गरी संसदीय सुनुवाइका लागि समितिसमक्ष पठाएको थियो।

प्रस्तावित न्यायाधीशमा उच्च अदालत जनकपुरका न्यायाधीश शारङ्गा सुवेदी, उच्च अदालत पाटन हेटौँडा इजलासका न्यायाधीश अब्दुल अजीज मुसलमान, उच्च  अदालत पाटनका न्यायाधीशद्वय महेश शर्मा र टेकप्रसाद ढुङ्गाना छन्।

परिषद्ले वरिष्ठ अधिवक्ताद्वय सुनिलकुमार पोखरेल र बालकृष्ण ढकाललाई सर्वाेच्च अदालतको प्रस्तावित न्यायाधीशमा सिफारिस गरेको हो। मंसिर ५ मा बसेको न्यायपरिषद्को बैठकले उनीहरूलाई न्यायाधीशमा सिफारिस गरेको हो।

न्यायाधीश सुवेदीका नाममा ६, ढुङ्गानाका ३ र मुसलमानका नाममा एक उजुरी परेको थियो।

न्यायाधीशका लागि शैक्षिक योग्यता, वरिष्ठ अधिवक्ता एवं अधिववक्ता हैसियतमा कम्तीमा १५ वर्ष निरन्तरुपमा वकालत, वरिष्ठता, अनुभव र विषयवस्तुको ज्ञान, कार्यकुशलता, इमान्दारिता, निष्पक्षता र नैतिक आचार, कानुन व्यवसायमा आर्जन गरेको ख्यातिका आधारमा परिषद्ले उनीहरुलाई छनोट गरेको हो।

उजुरीकर्तामध्ये गुरागाईंले न्यायालयमासमेत पहुँचवालाको मात्रै बोलावाला रहेको तथा न्याय र कानुनविपरीत त्रुटिपूर्ण फैसला सच्याउनका लागि न्यायालयमै कार्यरत कर्मचारीले जोखिमको सामना गर्नुपरेको बताएका थिए।

अर्का उजुरीकर्ता पौडेलले न्यायमूर्तिका क्रियाकलाप र कानुनविपरीतका फैसलाले न्यायालयप्रति जनताको आशा र भरोसा दिन प्रतिदिन खस्कँदै गएको प्रतिक्रिया दिए।

संसदीय सुनुवाइ समितिले उनीहरूलाई अनुमोदन गरेपछि नियुक्ति पाउनेछन्।