प्रधानमन्त्री प्रचण्डकी नातिनीको बिहेमा कानुनको धज्जी

काठमाडौँ- प्रधानमन्त्री पुष्पकमल दाहाल ‘प्रचण्ड’की नातिनी र भरतपुर महानगरकी प्रमुख रेणु दाहालकी छोरी प्रतिभा पाठकको विवाहमा कानुनको धज्जी उडाइएको छ। सयौँको संख्यामा मानिसलाई बोलाएर पाँचतारे होटल गोकर्ण फरेस्ट रिसोर्टमा भड्किलो विवाह गरेर मुलुकको कार्यकारी प्रमुखले नै कानुनको धज्जी उडाएका हुन्।

साम्यवादी विचारदर्शन मान्ने कम्युनिस्ट नेताले नै ‘भड्किलो विवाह’लाई प्रश्रय गरेको भन्दै सामाजिक सञ्जालमा उनको आलोचना सुरु भएको छ। कानुनले तोकेभन्दा बढी मानिसलाई निम्ता दिइएकाले प्रधानमन्त्री र स्थानीय सरकारको प्रमुखकै परिवारले देशको कानुन पालना नगरेकाले कानुनअनुसार उनीहरूलाई सजाय हुनुपर्ने माग पनि सञ्जालमा उठेको छ।

विवाहमा केही व्यक्तिहरू आउने र केही व्यक्तिहरू निस्कने गरेकाले १ हजारसम्मको सहभागिता भएको हुन सक्ने अनुमान आफूले गरेको वैवाहिक कार्यक्रमका एक सहभागीले बताएका छन्। मेयर दाहालको सचिवालयले भने बढीमा ५ सय जनासम्म सहभागी भएको हुन सक्ने आकलन गरिएको जिकिर गरेको छ।

‘सामाजिक व्यवहार (सुधार) ऐन २०३३‘को दफा ७ मा ५१ जनाभन्दा बढी जन्ती लैजान नहुने व्यवस्था छ। कानुनी व्यवस्था उल्लङ्घन गर्नेलाई १० हजार रुपैयाँसम्म जरिवाना र १५ दिनसम्म कैद वा दुवै सजाय गर्न सकिने व्यवस्था छ।

सोही ऐनको दफा ८ मा दुलाहा वा दुलही पक्षबाट आयोजित भोजमा पनि ५१ जनाभन्दा बढीलाई आमन्त्रण गर्न नपाइने व्यवस्था छ। उक्त संख्याभन्दा धेरै जनालाई बोलाए २० हजार रुपैयाँसम्म जरिवाना र १५ दिनसम्म कैद वा दुवै सजाय गर्न सकिने व्यवस्था पनि सोही ऐनमा छ।

प्रचण्डकी नातिनी तथा मेयर रेणु दाहाल र महानगरकै सल्लाहकार रहेका उनका पति अर्जुन पाठककी छोरी प्रतिभा पाठकको विवाह अर्थशास्त्रमा विद्यावारिधि गर्दै गरेका विज्ञानबाबु रेग्मीसँग भएको हो।