पोखरामा थपियो सेयर दलाल

पोखरा- धितोपत्र व्यवसायी सुमेरु सेक्युरिटिज प्रा.लि (ब्रोकर नं ३९)ले पोखराको सृजना चोकमा नयाँ शाखा शुरु गरेको छ।

सोमबार पूर्वउद्योग मन्त्री महेश बस्नेतले सुमेरुको शाखा कार्यालयको उद्घाटन गरेका हुन्। योसँगै पोखरामा सेयर कारोबार गर्ने ब्रोकरको संख्या ११ पुगेको छ।

नेपाल धितोपत्र बोर्डले ब्रोकर विस्तार फुकुवा गरेसँगै यस वर्ष मात्रै पोखरामा ४ वटा ब्रोकर शाखा थपिएका छन्।

२०६६ सालमा ब्रोकर नं १४ (नेपाल स्टक हाउस)ले पोखरामा पहिलो शाखाको रुपमा कारोवार सुरु गरेको थियो। पोखराका शाखामा करिब १ लाख १० हजार वटा डिम्याट खाता रहेको अनुमान गरिँदै आएको छ।

सुमेरु सेकुरिटिजको शाखा उद्घाटन गर्दै पूर्व उद्योगमन्त्री बस्नेतले देशको अर्थतन्त्र ठिक ठाँउमा ल्याउन सेयर बजारको भूमिका ठूलो रहने बताए।

सुमेरुका संस्थापक अध्यक्ष प्रेम कुमार अग्रवालले सेयर बजारमा सचेत भएर लगानी गर्नुपर्ने बताए। उनले सेयर बजार सरकारलाई राजस्वको ठूलो स्रोत भएकाले बजारको दायरा बढाउँदै लगिनु पर्ने बताए।