३ मतको शक्तिले ऊर्जामन्त्री बने लामा, मुख्यमन्त्रीका आकांक्षी आर्थिकमन्त्री

हेटौँडा- बागमती प्रदेश सरकारमा नेपाली कांग्रेसका तर्फबाट दुई जना मन्त्रीले नियुक्ति पाएका छन्। बागमती प्रदेश कांग्रेस संसदीय दलका नेता बहादुरसिं लामा आर्थिक मामिला मन्त्रालय लिएर सरकारमा गएका हुन् भने तीर्थ लामा सिँचाई तथा ऊर्जा मन्त्री बनेका हुन्। उनीहरू दुवैलाई आइतबार साँझ प्रदेशप्रमुख यादवप्रकाश शर्माले शपथ दिलाएका थिए।

बागमतीमा नेकपा माओवादी केन्द्रका तर्फबाट मुख्यमन्त्री बनेका शालिकराम जम्कट्टेललाई कांग्रेसले विश्वासको मत दिएर सरकारमा जाने बाटो तय गरेको थियो। एकीकृत समाजवादीले पनि विश्वासको मत दिएपनि सरकारमा सहभागी हुनेको नाम पठाएको छैन।

यसअघि एमाले र राप्रपासहितको गठबन्धनका बाट जम्मकट्टेल मुख्यमन्त्री बनेका थिए। तर दुवै दल सरकारबाट बाहिरिएपछि बागमतीमा ७ मन्त्रालय खाली थिए। कांग्रेसका दुई नेता सहभागी भएपछि पनि ५ मन्त्रालय रिक्त रहनेछन्।

तीन मतको शक्तिले मन्त्री बने तीर्थ
नेपाली कांग्रेस काभ्रेका सभापति एवम् बागमती प्रदेशसभा सदस्य तीर्थ लामाले खानेपानी, उर्जा तथा सिँचाई मन्त्रालयको जिम्मेवारी पाएका छन्।

२०७९ सालमा प्रदेशसभा सदस्यमा निर्वाचित लामा ३ मतको अन्तरले विजयी भएका थिए। निकटतम प्रतिस्पर्धी एमालेका चन्द्रबहादुर लामाले १९ हजार २७७ मत ल्याएका थिए भने तीर्थले १९ हजार २८० मत पाएको निर्वाचन आयोगको विवरणमा उल्लेख छ।

२०७० सालको संविधानसभा निर्वाचनमा उनी काभ्रे-१ कांग्रेसबाट निर्वाचित भएका थिए। सोही कार्यकालमा नेपाली कांग्रेस संसदीय दल कार्यसमितिको सदस्य निर्वाचित भएका उनी संसदको उद्योग, वाणिज्य तथा उपभोक्ता हित संरक्षण समितिको सदस्य भएका थिए।

२०६४ सालको निर्वाचनमा कांग्रेसले ७ हजार मत ल्याएको काभ्रे-१ मा २०७० सालमा तीर्थ १२ हजारभन्दा बढी मतान्तरले विजयी भएका थिए। तत्कालीन माओवादी केन्द्र र एमालेको गठबन्धन हुँदा २०७४ सालको प्रतिनिधि सभा निर्वाचनमा भने उनी ४ हजार २६ मत कम पाएर पराजित भए। त्यसबेला एमाले-माओवादी गठबन्धनका गंगाबहादुर दोङले ४३ हजार ६ सय ३१ पाउँदा तीर्थले ३९ हजार ६ सय ५ मत प्राप्त गरेका थिए।

२०६४ सालबाट नेपाली कांग्रेसको राजनीति सुरु गरेका लामा सोही वर्ष क्षेत्रीय उपसभापति मनोनित भएका थिए। पार्टीको १२औं र १३औँ महाधिवेशनमा क्षेत्रीय सभापति निर्वाचित लामा संघीयतापछि जिल्ला २ निर्वाचन क्षेत्रमा विभाजन भएपछि प्रतिनिधि सभा क्षेत्र नं १ को सभापति भए। पार्टीको १४औं महाधिवेशनमा उनी जिल्ला सभापतिमा निर्वाचित भए। पार्टी राजनीतिमा उनी संस्थापन पक्षका नेता मानिन्छन्।

बहादुर बने आर्थिक मामिलामन्त्री
नुवाकोट-२ (ख) बाट विजयी भएका बहादुरसिं लामाले आर्थिक मामिला तथा योजना मन्त्रालयको जिम्मेवारी पाएका छन्। बागमती प्रदेशमा कांग्रेस संसदीय दलका नेताको जिम्मेवारीमा रहेका लामाले आइतबार साँझ प्रदेश प्रमुख यादवचन्द्र शर्मासमक्ष पद तथा गोपनीयताको शपथ लिएका हुन्।

२०७९ मंसिर ४ मा सम्पन्न निर्वाचनमा बहादुरले नेकपा एमालेका विजयसिंह लामा तामाङलाई ८ हजार १२५ मतान्तरले पछि पार्दै विजयी भएका थिए। बहादुरले १७ हजार २४९ मत प्राप्त गर्दा विजयले ९ हजार १२४ मत पाएका थिए।

पुस १३ गते सम्पन्न बागमती प्रदेश नेपाली कांग्रेस संसदीय दलको निर्वाचनमा बहादुर संसदीय दलको नेतामा निर्वाचित भएका थिए। लामा २१ मतसहित निर्वाचित हुँदा उनका प्रतिद्वन्द्वी ईन्द्रबहादुर बानियाँले १६ मत पाएका थिए। ११० सदस्यीय बागमतीमा नेपाली कांग्रेसले प्रत्यक्षमा २५ र समानुपातिकमा १२ गरी ३७ सिट जितेको थियो।

बहादुर पार्टी राजनीतिमा संस्थापन पक्षमाका नेता मानिन्छन्। तर संसदीय दलको नेताको चुनावमा भने उनलाई संस्थापसहित इतर समूहको समेत साथ रहेको थियो। बहादुर कांग्रेस केन्द्रीय सदस्य हुन्।

नेपाली कांग्रेसले यसअघि प्रदेशको मुख्यमन्त्रीमा दाबी गर्दै आएको थियो। कांग्रेसले मुख्यमन्त्री दाबी गरेका बेला संसदीय दलका नेता बहादुरलाई मुख्यमन्त्री बनाउने भनिएको थियो।