गभर्नर अधिकारीको योग्यतामा प्रश्न उठाएको रिट माथेमाको इजलासमा

काठमाडौँ- गभर्नर महाप्रसाद अधिकारीको योग्यतामाथि प्रश्न उठाउँदै परेको रिटको सर्वोच्च अदालतमा प्रारम्भिक सुनुवाइ हुने भएको छ।सर्वोच्चकी न्यायाधीश सुष्मलता माथेमाको इजलासमा उक्त रिटमाथि सुनुवाइ हुने भएको हो।

बिहीबार गभर्नर अधिकारीको योग्यतामाथि प्रश्न उठाउँदै अधिवक्ता दीपकराज जोशीसहित चार जनाले रिट दायर गरेका थिए। त्यसको प्रारम्भिक सुनुवाइ शुक्रबार हुन लागेको हो।

गभर्नर अधिकारी २०७६ चैत २४ गते नियुक्त भएका थिए। नेपाल राष्ट्र बैंक ऐन, २०५८ को दफा २० सञ्चालकको योग्यता अनुसार नभएको भन्दै रिट निवेदकले दाबी गरेको छ।

आर्थिक मौद्रिक, बैंकिङ, वित्तीय, वाणिज्‍य, व्यवस्थापन, जनप्रशासन, तथ्यांकशास्त्र, गणित वा कानुन विषयमा कम्तीमा स्नातकोत्तर उपाधि हासिल गरी आर्थिक, मौद्रिक, बैंकिङ, वित्तीय वा वाणिज्य कानुनको क्षेत्रमा कार्य अनुभव हासिल गरेको हुनुपर्छ। तर अधिकारीसँग स्नातकोत्तरको योग्यता नभएको जिकिर रिटमा गरिएको छ।