सिंहदरवारको फोहोरका विषयमा बालेनसँग वार्ता गर्ने मन्त्रिपरिषद्को निर्णय

काठमाडौँ- सिंहदरवारको फोहोर नउठाएको विषयमा संघीय सरकारले काठमाडौँ महानगरका मेयर बालेन्द्र शाहसँग छलफल गर्ने भएको छ। बुधबार बसेको मन्त्रिपरिषद् बैठकले मेयर शाहसँग छलफल गर्ने निर्णय गरेको हो।

संघीय सरकारले आफ्ना काममा सहयोग नगरेको भन्दै सिंहदरबार, बालुवाटार र शीतलनिवासको फोहोर नउठाउन महानगरको सम्बन्धित विभागलाई निर्देशन दिएका छन्। उनको निर्देशनपछि सिंहदरवारमा फोहोर थुप्रिन थालेको छ।

‘फोहोर नउठेको विषय गम्भीर कुरा हो। यो स्थानीय तहको अधिकार क्षेत्रको कुरा भए पनि किन त्यसो गरियो भनेर यसबारे आवश्यक कुरा गर्ने निर्णय भयो,’ सरकारकी प्रवक्ता रेखा शर्माले भनिन्, ‘काठमाडौँ उपत्यकाको फोहोर काठमाडौँ महानगरपालिकाले उठाउने नीतिगत व्यवस्था हो। यो व्यवस्था परिवर्तन भएको छैन। व्यवस्था परिवर्तन नहुँदै महानगर प्रमुखले त्यस्तो घोषणा किन गर्नुभयो? यसलाई सरकारले गम्भीर रुपमा लिएको छ।’ संघ सरकारले महानगरपालिकाका मेयर बालेन्द्र शाहलाई जिम्मेवारीबोध गर्नसमेत सचेत गराएको छ।

यसअघि सोमबारको प्रतिनिधि सभा बैठकमा नेपाली कांग्रेसका महामन्त्री समेत रहेका सांसद गगन थापाले महानगरसँग वार्ता गर्न आग्रह गरेका थिए।