सहकारीबाट डेढ अर्ब ठगीको आरोप लागेका ढोरपाटनका मेयरविरुद्ध ‘रेड कर्नर नोटिस’

बागलुङ- बचतकर्ताको डेढ अर्ब रकम हिनामिना गरी सम्पर्कविहीन बनेका बागलुङको ढोरपाटनका मेयर देवकुमार नेपालीलाई पक्राउ गर्न प्रहरीले रेड कर्नर नोटिस जारी गरेको छ।

इमेज बचत तथा ऋण सहकारी संस्थाका अध्यक्षसमेत रहेका नेपालीलाई पक्राउ गर्न प्रहरीले ‘रेड कर्नर नोटिस’ निकालेको हो।

सहकारीको रकम हिनामिनामा नेपाली र उनकी श्रीमतीसहित ८ जनाविरुद्ध मुद्दा चलिरहेको छ। अध्यक्ष नेपाली गत वैशाखदेखि फरार छन्।

उनकी श्रीमती छेला नेपालीलाई पनि पक्राउ गर्न प्रहरी प्रधान कार्यालयले रेड कर्नर नोटिस जारी गरेको हो।

फरार अभियुक्त तथा प्रतिवादी खोज्न प्रहरीले संसारभरका प्रहरीहरुको अन्तरराष्ट्रिय सञ्जाल (इन्टरपोल)मार्फत् ‘रेड कर्नर नोटिस’ जारी गरेको हो।

सहकारीका पीडितहरुले रेड कर्नर नोटिस जारी गर्नुपर्ने माग गर्दै आएका थिए। बागलुङका डिएसपी मदन केसीले नेपाली दम्पत्तीलाई पक्राउ गर्न इन्टरपोलले रेड कर्नर नोटिस जारी गरेको बताए।

‘अब उनी जुन देशमा छन् त्यही देशको प्रहरीले पक्राउ गरेर नेपाल प्रहरीलाई हस्तान्तरण गर्छ,’ डिएसपी केसीले भने।

उनीहरुविरुद्ध १ हजार ५ सय ५० जना सर्वसाधारणले प्रहरीमा जाहेरी दिएका थिए। उक्त जाहेरीको आधारमा सरकारी वकिलको कार्यालयले जिल्ला अदालतमा संगठित ठगीको मुद्दा दायर गरेका छन्।

सहकारीका बचतकर्ताको १ अर्ब ६० करोड रुपैयाँ नेपालीले हिनामिना गरेको आरोप छ।

नेपालीले ग्लोबल आइएमई बैक, राष्ट्रिय सहकारी बैंक र गरिमा बिकास बैंकको गरी झन्डै ३५ करोड थप ऋणसमेत लिएको देखिएको छ।

यही प्रकरणमा सहकारीका अन्य पदाधिकारी चित्रबहादुर भण्डारी, नरमती बुढा, शक्ति किसान, डोरबहादुर परियार र अनिता बुढामगर पक्राउ परिसकेका छन्।

उनीहरुलाई जिल्ला अदालत बागलुङको गत साउन ५ गतेको आदेशले पुर्पक्षका लागि थुनामा पठाएको छ।

पक्राउ परेका ५ जनाले अदालतमा सहकारीमा आफूहरुको कुनै हात नभएको बयान दिएका छन्।

संस्थाकी कोषाध्यक्ष लक्ष्मी सेन सुनारलाई प्रहरीले बिहीबार ललितपुरबाट पक्राउ गरेको छ।

इमेजले गत वैशाख ७ गते सूचना प्रकाशित गरेर सहकारी संस्था बन्द गरेको थियो।

इमेज सहकारीकी कोषाध्यक्ष पक्राउ