आजदेखि धरहराको बेसमेन्टमा निःशुल्क पार्किङको व्यवस्था

काठमाडौँ- काठमाडौँ टावरपछि अब धरहराको बेसमेन्टमा पनि निःशुल्क पार्किङको व्यवस्था गरिएको छ। 

न्यूरोडमा पार्किङ निषेध भएपछि उचित बिकल्पका रुपमा काठमाडौँ महानगरले धरहराको बेसमेन्टमा निःशुल्क पार्किङको व्यवस्था गरेको हो।

महानगरपालिकाले आइतबारदेखि सुन्धारास्थित निर्माणाधीन धरहराको जमिनमुनिको तला (बेसमेन्ट)मा निःशुल्क पार्किङ सेवा उपलब्ध गराउने भएको हो। 

महानगर प्रहरी बलका प्रमुख नगर प्रहरी वरिष्ठ उपरीक्षक राजुनाथ पाण्डेले काठमाडौँ टावर (साबिक पुरानो बसपार्क) मा यसअघि नै निःशुल्क पार्किङ सेवा उपलब्ध गराइसकेको बताएका छन्। ‘सरोकारवालासँगको समन्वयमा आइतबारदेखि धरहरा क्षेत्रमा रहेको बेसमेन्टमा पार्किङ सेवा उपलब्ध गराइएको हो’ उनले भने। 

 उनका अनुसार ३ तला पार्किङ निर्माण गरिएको धरहरा क्षेत्रमा कुल डेढ लाख वर्गफिट क्षेत्रफलमा पार्किङ गर्न सकिन्छ। चारपाङ्ग्रे सवारीसाधन चार सय र मोटरसाइकल १ हजार ५ सयभन्दा बढी पार्किङ गर्न सकिन्छ। संरचनागत रूपमा यो ठाउँ मुलुककै अहिलेसम्मको सबभन्दा ठुलो पार्किङ संरचना रहेको बताइएको छ।