आँखैअघि गौरीशंकर [फोटो फिचर]

दोलखा- वसन्त ऋतुको आगमन सँगै घुमफिरमा जानेहरू बढ्न थालेका छन्। काठमाडौँबाट एक दिनको ड्राइभमा पुग्न सकिने चेर्दुङमा पर्यटकीय गतिविधि बढ्न थालेको छ। गारीशंकर हिमालदेखि सगरमाथा र नुम्बुरसम्मका रमणीय स्थान नियाल्न सकिने भएकाले चेर्दुङप्रति पर्यटक आकर्षित हुने गरेका हुन्।

दोलखा जिल्लाको जिरीको शिर भएर उभिएको सुन्दर डाँडा हो चेर्दुङ। यसको सुन्दरताका कारण कतिपयले यसलाई ‘नेपालको स्वीटरल्यान्ड’ पनि भन्ने गरेका छन्। जिरीलाई काखमा राखेर चेर्दुङ डाँडाले अभिभावकत्वको भूमिका निभाईरहेको चेर्दुङ समुन्द्र समहबाट करिब ३७०० मिटरको उचाईमा छ।

प्राकृतिक मनोरम र सांस्कृतिक वैभवका रूपमा हिन्दू र बौद्ध धर्मावलम्बीको साझा तीर्थस्थल पनि हो। डाँडाको सुन्दर पाखामा खुल्ला आकाशमुनि महादेव शीला छ। भक्तजनले चढाएका त्रिशूल प्रशस्तै छन्। ध्वजा तथा पाताकाले शीलालाई सिँगारिएको छ। वरिपरि लुङ्दर टाँगिएको छन्। चण्डीपूर्णिमा र राम्बोले पूर्णिमामा यहाँ विशेष मेला लाग्दछ। यहाँ पूजा गर्नाले रोगव्याधि नलाग्ने, चिताएको पुग्ने र जंगली जनावरले दुःख नदिने जनविश्वास छ।

चेर्दुङ डाँडैबाट सगरमाथाको चुचुरो देखिनुका साथै गौरीशंकर र नुम्बुर हिमाल आँखै अगाडि ठोकिन पुग्छन्। रामदुङ, छेकिगो, टासीलाप्सा, आमाबामरेजस्ता दर्जनौं हिमशृंखलाको मनोरम दृश्य देख्न सकिन्छ। डाँडाबाट दोलखा, रामेछाप, सिन्धुपाल्चोक, काभ्रेपलान्चोक, काठमाडौं, सिन्धुली, ओखलढुंगा, सोलुखुम्बुलगायतका दृश्य हेर्न पाइन्छ।

डाँडैबाट सूर्योदय र सूर्यास्तको आनन्द लिन सकिन्छ। बाटोमा चेर्दुङ नपुग्दै बाटोमा क्याङसे पोखरी रहेको छ। उक्त पोखरी सानो भए पनि मनै लोभ्याउने छ। रूखको छायाँमा बसेको सुन्दर पोखरी क्याङ्से नजिकै सानो चौरीगोठ छन्। वरपर रूखहरू भएता पनि पोखरीमा रूखको पातहरू खसेपछि कुनै न कुनै चरा आएर लिएर जाने गरेकाले त्यस पोखरीमा पात हुँदैन। यहीँ पोखरीमा चौरीले पानी पिउँदा रहेछन्।

जिरी बजारबाट करिब ३–४ घण्टाको पैदल दूरीमा रहेको यो पोखरीसम्म गाडीमा जाने हो भने करिब १ घण्टामै पुगिन्छ। यहाँ पोखरी वरपरको सुन्दर हरियाली पाखा पखेरासँगै चराचुरूङ्गीका भाका सुन्न पाइन्छ। यहाँ गोठमा छुर्पी बनाईरहेको हेर्न र चाख्न पनि पाईन्छ। यहाँ पोखरीमा पूजा गर्नाले दैवी विपत्ती नआउने, मौसम राम्रो हुने र आकाश खुल्ने जनविश्वास रहेछ।

कसरी पुग्ने चेर्दुङ?
जिरी नगरपालिकाको धेरै ठाउँबाट चेर्दुङ पदयात्रा गर्न सकिन्छ। जिरीबजार–गोकुलगंगा पार्क–रमिते डाँडा–पटासे डाडा–क्याङ्से पोखरी–चेर्दुङ पुग्न पैदल गए ७ घण्टा लाग्छ।

मोटरबाटोबाट जाँदा जिरी बजार –रातमाटे–कुथामे–जोरमाने–क्याङ्से पोखरीसम्म मोटर लिएर जान सकिन्छ। त्यहाँबाट ३ घण्टा पैदलयात्रा गरेपछि चेर्दुङ डाँडा पुग्न सकिन्छ ।

-नेपाल फोटो लाइब्रेरी