भारतको मानवरचना इन्स्टिच्युटले नेपालीलाई छात्रवृत्ति दिने

काठमाडौँ– भारतको मानव रचनाविश्वविद्यालयअन्तर्गतको मानवरचना इन्टरनेसनल इन्स्टिच्युट अफ रिसर्च एन्ड स्टडिजले नेपाली विद्यार्थीलाई छात्रवृत्ति उपलब्ध गराउने भएको छ।

नयाँदिल्लीस्थित इन्स्टिच्युटले शुक्रबार काठमाडौँमा इन्फोसेसन कार्यक्रम आयोजना गरी नेपाली विद्यार्थीलाई ५० प्रतिशतसम्म छात्रवृत्ति दिने जानकारी गराएको हो।

छिमेकका विद्यार्थीलाई सहुलियत शुल्कमा अन्तर्राष्ट्रियस्तरको गुणस्तरीय शिक्षामा पहुँच पुर्‍याउनका लागि नेपाली विद्यार्थीका लागि छात्रवृत्ति योजना ल्याउन लागिएको इन्स्टिच्युटको दाबी छ।

कार्यक्रममा बोल्दै इन्स्टिच्युटकी मार्केटिङ डेपुटी जनरल म्यानेजर अञ्जली बालाचन्दरनले विद्यार्थीलाई उद्यमशील बन्ने प्रेरित गर्ने गरी अध्यापन गराउने भएकाले पछिल्ला दिनमा इन्स्टिच्युटमा विभिन्न देशका विद्यार्थीको आकर्षण बढेको बताइन्।

‘मानवरचना गुणस्तरीय शिक्षासँगै विद्यार्थीलाई अध्ययन पश्चात रोजगारीको अवसर सृजना गर्न पनि तत्पर छ। विद्यार्थीले यहाँ अन्तर्राष्ट्रिय स्तरको गुणस्तरीय शिक्षा प्राप्त गर्न सक्छन्,’ उनले भनिन्, ‘विद्यार्थीलाई उद्यमशिल हुने ढंगबाट विश्वविद्यालयले अध्यापन गराउँछ।’

विगत १३ वर्षदेखि इन्डोग्लोबल फाउन्डेसनले इन्स्टिच्युटका लागि भर्ना हुन चाहने विद्यार्थीका लागि शैक्षिक परामर्श सेवा उपलब्ध गराउँदै आएको छ। फाउन्डेसनका प्रबन्ध निर्देशक सुदन चौहानले मानवरचना गुणस्तरीय शिक्षा प्रदान गर्न कटिबद्ध रहेको र त्यहाँ अध्ययन गरेका विद्यार्थीले गरेको प्रदर्शनबाट आफू सन्तुष्ट भएको बताए।

‘विद्यार्थीले मानवरचनाबाट गुणस्तरीय शिक्षामात्रै पाएका छैनन्। अध्ययन पश्चात आफ्नो क्षेत्रमा अब्बल सावित पनि भएका छन्,’ उनले भने। यस विश्वविद्यालयबाट दुई सय भन्दा बढि नेपाली विद्यार्थीहरू लाभान्वित भइसकेको उनको भनाइ छ।

मानवरचना विश्वविद्यालयका संस्थापक शिक्षाविद् डा. ओपी भल्ला हुन्। उनले गुणस्तरीय इन्जिनियरिङ र व्यवस्थापन तर्फका जनशक्ति उत्पादन गर्ने उद्देश्यले यस शिक्षणसंस्थाको स्थापना गरेका हुन्।

डिम्ड टु बी युनिभर्सिटिको रुपमा सञ्चालित यस संस्थाले इन्जिनियरिङ, व्यवस्थापन, मनोविज्ञान, अर्थशास्त्र, कम्प्युटर विज्ञान, मानविकी, शिक्षा, कानुन, आन्तरिक डिजाइन, वाणिज्य, व्यापार लगायत विभिन्न क्षेत्रहरूमा गुणस्तरीय शिक्षा प्रदान गर्दै आएको छ।

यस विश्वविद्यालयमा एक सय भन्दा बढी कार्यक्रमहरूमा २० भन्दा बढी देशका विद्यार्थी अध्ययनरत छन्। ३९ हजार भन्दा बढीलाई उच्च शिक्षा प्रदान गरेको संस्थाका २५ वटा सेन्टर अफ एक्सिलेन्स छन्।

मानव रचनासँग रहेको करियर डेभलप्मेन्ट सेन्टरले विद्यार्थीहरूलाई अध्ययन पश्चात रोजगारीको अवसरहरू उपलब्ध गराउन मद्दत गर्दै आएको छ।