माओवादी उपाध्यक्ष महरा र विनोद चौधरीको बयान लिने सीआईबीको तयारी

काठमाडौँ- उपप्रधानमन्त्री एवं गृहमन्त्री रवि लामिछानेको निर्देशनपछि नेपाल प्रहरीको केन्द्रीय अनुसन्धान ब्युरो (सीआईबी)ले नेकपा माओवादी केन्द्रका उपाध्यक्षसमेत रहेका पूर्वसभामुख कृष्णबहादुर महरा र नेपाली कांग्रेसका सांसद विनोद चौधरीको बयान लिने तयारी गरेको छ।

नेपाल प्रहरीका महानिरीक्षक बसन्त कुँबर, गृहसचिव एकनारायण अर्याल र नेपाल प्रहरीको केन्द्रीय अनुसन्धान विभागका प्रमुख श्याम ज्ञवालीलाई बोलाएर महरा र चौधरीमाथि अनुसन्धान थाल्न निर्देशन दिएपछि सीआईबीले बयान लिने तयारी गरेको हो। निर्देशनसँगै गृहमन्त्री लामिछानेले सुन तस्करीको प्रतिवेदन पनि सीआईबीलाई जिम्मा लगाएका छन्।

सुन तस्करी प्रकरणमा माओवादी केन्द्रका उपाध्यक्ष महरा संलग्न भएको आरोप छ। उता चौधरीमाथि भने बाँसबारी छाला जुत्ता कारखानाको जग्गा अवैध तरिकाले निजीकरण गरेको आरोप छ।

यस्तै गृहमन्त्री रवि लामिछानेले बाँसबारी छाला जुत्ता कारखानाको १० रोपनी जग्गा सरकार माहतत ल्याउने प्रक्रिया आजै सुरु गर्न समेत निर्देशन दिएका थिए।

उनीहरुलाई बयानका लागि बोलाउने र अटेर गरेमा पक्राउ गर्ने तयारीमा सीआईबी छ।

बाँसबारी छाला जुत्ता कारखानाको जग्गा प्रकरणमा केही दिनपहिले विनोद चौधरीका भाइ अरुण चौधरी पक्राउ परेका थिए।