शालिनको मृत्युपछि पक्राउ परेका तीनै शिक्षक धरौटीमा रिहा

काठमाडौँ-  चितवनको रत्ननगरस्थित एकता शिशु निकेतनकी छात्रा शालीन पोखरेलको मृत्युपछि पक्राउ परेका तीनै जना शिक्षक धरौटीमा रिहा भएका छन्।

न्यायाधीश रमेशप्रसाद ज्ञवालीको इजलासले प्रधानाध्यापक बालहरि देवकोटालाई ३ लाख, सहप्रधानाध्यापक किरणबहादुर अधिकारीलाई र होस्टल वार्डेन कमलप्रसाद शर्मालाई ५/५ लाख धरौटी बुझाएर छाड्न आदेश दिएको हो।

फागुन १२ गते विद्यालयको छात्रावासमा १४ वर्षीया शालीन झुन्डिएको अवस्थामा भेटिएपछि उनीहरू पक्राउ परेका थिए।

शालीनको हत्यामा उनीहरू दोषी रहेको भन्दै बाबु दीपेन्द्र पोखरेलले प्रहरीमा दिएको जाहेरीका आधारमा उनीहरूलाई पक्राउ गरिएको थियो।

शालीनको पोष्टमार्टम रिपोर्टमा हत्या गरेको नदेखिएको प्रहरीको भनाइ छ। शालीनको नोटकपी, उत्तरपुस्तिका र सुसाइड नोट परीक्षण गर्दा सुसाइड नोट उनी आफैंले लेखेको रिपोर्ट आएको छ।

सरकारी वकिलको कार्यालयले आइतबार चितवन जिल्ला अदालतमा आत्महत्या गर्न दुरूत्साहन दिएको मुद्दामा अभियोजन गरेको थियो।