एक वर्षमै एप्पलले बेच्यो साढे ५७ अर्ब डलरको आईफोन, ५० खर्ब डलरसहित बन्यो मूल्यवान कम्पनी

एजेन्सी: अमेरिकाको प्रविधि कम्पनी एप्पल इंकको आम्दानी १२ प्रतिशत बढेको छ। यो वर्षको चौथो त्रैमासमा एप्पले १ खर्ब १४ अर्ब ५० करोड डलरको आम्दानी गरको जनाइएको छ।

यो आँकडा विश्लेषकहरूको १ खर्ब १३ अर्ब ४० करोड डलरको अनुमानभन्दा बढी हो। अघिल्लो वर्षको सोही अवधिमा एप्पलको कुल आम्दानी १ खर्ब २ अर्ब ५० करोड डलर थियो।

कम्पनीको प्रति सेयर आम्दानी २.१० डलर रह्यो। जुन विश्लेषकहरूको १.९९ डलरको अनुमानभन्दा बढी हो।

यो वर्षको चौथो त्रैमासिकमा एप्पलले आईफोन बिक्रीबाट ५७.६ अर्ब डलर आम्दानी गरेको छ। नयाँ प्रमुख कार्यकारी अधिकृत (सीईओ) जोन टर्नसको नेतृत्वमा सार्वजनिक भएको यो पहिलो त्रैमासिक प्रतिवेदन हो। जसले विश्वको सबैभन्दा मूल्यवान कम्पनीको रूपमा पुनः स्थापित भएको एप्पलका लागि सकारात्मक भविष्यको संकेत गरेको छ।

आईफोनको बिक्री—जसमा आईफोन १८ प्रो बजारमा आएपछिका पहिलो आठ दिनको बिक्रीसमेत समावेश छ। यो वाल स्ट्रिटुको ५६.६ अर्ब डलरको अनुमानभन्दा बढी हो।

आम्दानीसम्बन्धी विवरण सार्वजनिक भएलगत्तै नियमित कारोबार समय सकिएपछिको अवधिमा एप्पलको सेयर मूल्य १ प्रतिशत घट्यो। त्यसअघि, दिनभरको कारोबार बन्द हुँदा कम्पनीको सेयर मूल्य १.८ प्रतिशत घटेर ३३८.३२ डलरमा कायम भएको थियो।

एप्पल ५० खर्ब डलरको मूल्यवान कम्पनी

गत जुलाई २८ मा एप्पल ५० खर्ब (५ ट्रिलियन) डलरभन्दा बढीको मूल्य पुग्ने दोस्रो कम्पनी बन्यो। सोमबारको बजार बन्द हुँदा ४९ खर्ब ४० अर्ब (४.९४ ट्रिलियन) डलरको बजार पुँजीकरण (मार्केट क्यापिटलाइजेसन) सहित हाल विश्वको सबैभन्दा मूल्यवान कम्पनी भएको छ।

एप्पलको बजार मूल्य विश्वको चौथो ठूलो अर्थतन्त्र जापान, पाँचौ बेलायत, छैटौँ भारत र सातौं स्थानमा रहेको फ्रान्सको अर्थतन्त्रको आकार भन्दा ठूलो रहेको छ।

एप्पलले यो स्थान यसले शुक्रबार एनभिडियाबाट पुनः आफ्नो कब्जामा लिएको हो। एप्पल १ ट्रिलियन, २ ट्रिलियन र ३ ट्रिलियन डलरको बजार पुँजीकरणको कोसेढुङ्गा पार गर्ने पहिलो कम्पनी पनि थियो।

जुलाईमा देखिएको सामान्य उतार चढाव र अक्टोबर २३ को बिहान केही मिनेटका लागि देखिएको अर्को छोटो अवधिको परिवर्तनलाई छोड्ने हो भने २०२५ मा माइक्रोसफ्ट कर्पोरेशनलाई उछिन्ने बेलादेखि नै एनभिडिया विश्वको सबैभन्दा मूल्यवान कम्पनीको रूपमा रहँदै आएको थियो।

झन्डै १५ वर्षसम्म सीईओको जिम्मेवारी सम्हालेका टिम कुकको ठाउँमा गत सेप्टेम्बर १ देखि टर्नस कम्पनीको सीईओ बनेका छन्।

एप्पलको आम्दानी समग्र प्राविधिक क्षेत्रका सेयरहरूका लागि निकै महत्त्वपूर्ण हुन्छ। जसका लागि अक्टोबर महिना निकै कठिन रह्यो। आर्टिफिसियल इन्टेलिजेन्स (एआई) मा ठूलो लगानी गरिरहेका अल्फाबेट र मेटा (फेसबुक) जस्ता अन्य ठूला प्राविधिक कम्पनीहरूको तुलनामा एप्पलले भने ठूलो पुँजीगत खर्च गर्नबाट आफूलाई जोगाएको छ।

यद्यपि, मेमोरी चिपको बढ्दो लागतका कारण यसका धेरै उत्पादनहरूको मूल्य भने बढेको छ। एप्पलको नयाँ फोल्डेबल (मोड्न मिल्ने) आईफोन डुओको मूल्य १ हजार ९९९ डलरबाट सुरु हुन्छ।

यद्यपि, यसको बिक्री कम्पनीको सन् २०२७ को आर्थिक वर्षको पहिलो त्रैमासिकमा सुरु हुने भएकाले यस मोडलबाट प्राप्त हुने आम्दानी चौथो त्रैमासिकको तथ्यांकमा समावेश गरिएको छैन।