नेपाल प्रहरीका ८ एसपी पद १० महिनादेखि रिक्त

काठमाडौँ- नेपाल प्रहरीका ८ उपरीक्षक (एसपी) पद १० महिनादेखि रिक्त रहेका छन्। प्रहरीको नियमावलीमा पद रिक्त भएको ३ महिना भित्र बढुवा गरिसक्नु पर्ने उल्लेख भए पनि १० महिनादेखि उक्त पद रिक्त रहेका हुन्।

प्रहरी नियमावली २०७१ को दफा २६ अनुसार पद रिक्त रहेको मितिले तीन महिनाभित्र बढुवा गरिसक्नुपर्ने हुन्छ। दफा २६ मा लेखिएको छ, ‘(१) नियम ९ बमोजिम प्रतिशत निर्धारण भई बढुवाद्वारा पदपूर्ति गर्न लेखी आएको मितिले ३ महिनाभित्र बढुवा समितिले पदपूर्ति गरिसक्नु पर्नेछ।’

गत साउनमा ३० वर्षे सेवा अवधिका कारण प्रहरी उपरीक्षक (एसपी) दानबहादुर मल्ल र वामदेव गौतम अनिवार्य अवकाशमा गए। मल्ल र गौतम अवकाशमा गएपछि प्रहरीमा २ एसपीको पद रिक्त भएको थियो।

गत ७ माघदेखि अहिलेसम्म नेपाल प्रहरीमा ८ एसपीका पद रिक्त छन्। साउनदेखि चैतसम्मको १० महिना अवधिमा ८ एसपीका पद रिक्त हुँदा पनि अहिलेसम्म बढुवा हुन सकेको छैन।

डीएसपीबाट एसपी बढुवाका लागि ८ साउन २०७२ मा डीएसपी भएका १२ जना प्रतिस्पर्धामा छन्। रिक्त पद संख्या ८ हुनु र जम्मा प्रतिस्पर्धीको संख्या १२ मात्रै हुँदा पनि अहिलेसम्म बढुवा हुन नसकेको भन्दै प्रतिस्पर्धीहरुले गुनासो गरेका छन्।

रिक्त पद १० महिनासम्म खाली राख्नु र एउटै मितिमा भर्ना भएकाहरु एसपी भएको २ वर्ष हुँदा समेत बढुवा नहुँदा प्रतिस्पर्धीहरु निराश छन्।

प्रहरी नियमावलीले नै रिक्त भएको मितिले ३ महिनासम्म बढुवा गरिसक्नुपर्ने बताए पनि अहिलेसम्म बढुवा नभएकोबारे जिज्ञासा राख्दा नेपाल प्रहरीका केन्द्रीय प्रवक्ता तथा डीआईजी भीम प्रसाद ढकाल संगठनले जतिसक्दो चाँडो बढुवाको तयारी गरिरहेको बताउँछन्।