प्रतिनिधि सभा र प्रदेश सभाका सांसदको सङ्ख्या घटाउन माग

काठमाडौँ- प्रतिनिधिसभा र प्रदेशसभाका सांसदको सङ्ख्या कम गर्न राष्ट्रिय सभामा माग उठेको छ। बैठकको शून्य समयमा बोल्दै सांसद खिमलाल देवकोटाले शासन व्यवस्था तथा पार्टी नेतृत्व तहमा सुधारको आवश्यकता औँल्याएका हुन्।

‘प्रधानमन्त्रीको कार्यकाल दुईपटक, सासंद वा मन्त्री तीनपटक र पार्टी/दलको नेतृत्व दुई कार्यकालभन्दा बढी नहुने व्यवस्था गरौँ,’ उनले भने, ‘समानुपातिक समावेशी सहभागितालाई प्रत्यक्ष निर्वाचन प्रणालीमै समावेश गरी समानुपातिक निर्वाचन प्रणाली खारेज गरौँ।’

प्रतिनिधिसभामा सदस्य सङ्ख्या दुई सय ७५ बाट घटाएर १६५ र प्रदेशसभाको सङ्ख्या पाँच सय ५० बाट घटाएर ३३० मात्रै कायम गर्न सुझाव दिए।

विभिन्न आयोग तथा सरकारी कार्यालयमा हुने नियुक्ति प्रक्रिया नियमसङ्गत नरहेको पनि उनको भनाइ छ। ‘अदालत, संवैधानिक निकाय, विश्वविद्यालयलगायतका निकायहरुमा दलीय भागबन्डाका आधारमा गरिने नियुक्ति र सार्वजनिक संस्थानहरुमा पार्टी सदस्य भर्ना गर्ने काम बन्द गरौँ,’ उनको आग्रह छ।

नागरिकका समस्या र गुनासा तत्कालै सम्बोधन गर्न सरकारले संयन्त्र बनाउनुपर्ने उनको सुझाव छ।