सन्दीप लामिछाने निर्दोष ठहर, जिल्लाको फैसला उल्टियो

काठमाडौँ-  क्रिकेटर सन्दीप लामिछाने निर्दोष ठहर भएका छन्। जिल्ला अदालत काठमाडौँको फैसला उल्टाउँदै पाटन उच्च अदालतले लामिछानेलाई निर्दोष ठहर गरेको हो।

उच्च अदालत, पाटनका न्यायाधीशद्वय सुदर्शनदेव भट्ट र अञ्जु उप्रेती ढकालको इजलासले काठमाडौं जिल्ला अदालतको फैसला उल्ट्याउँदै सन्दीपलाई सफाइ दिएको उच्च अदालतका प्रवक्ता विमल पराजुलीले जानकारी दिए।

लामिछाने बलात्कार आरोपमा जिल्लाबाट दोषी ठहर भएका थिए। गौशाला २६ (परिवर्तित नाम)ले हालेको मुद्दामा जिल्ला अदालतले सन्दीपलाई दोषी ठहर गर्दै ८ वर्षको जेल सजाय सुनाएको थियो। बुधबार उच्चले उक्त फैसला उल्टाएको हो।

जिल्ला अदालतले दोषी ठहर गरेपछि नेपाल क्रिकेट संघ (क्यान) ले उनलाई निलम्बनमा राखेको थियो।

२०७९ भदौ ५ गते लामिछानेले आफूमाथि बलात्कार गरेको आरोप लगाउँदै गौशाला-२६ ले २०७९ भदौ २१ गते लामिछानेविरुद्ध प्रहरीमा किटानी जाहेरी दिएकी थिइन्।

त्यसबेला क्यारेबियन प्रिमियर लिग क्रिकेट खेल्न सन्दीप वेस्ट इन्डिजमा पुगेका थिए। उनी भदौ ६ गते नै त्यसका लागि प्रस्थान गरेका थिए।

प्रहरीमा जाहेरी परेको सार्वजनिक भएपछि राष्ट्रिय टोलीसँगै नफर्की भागेका थिए। पछि इन्टरपोलमार्फत पक्राउ पर्ने सूचना जारी भएपछि उनी नेपाल फर्किएका थिए। नेपाल फर्कनेवित्तिकै प्रहरीले उनलाई पक्राउ गरेको थियो।

काठमाडौं जिल्ला अदालतले कात्तिक १८ गते लामिछानेलाई पुर्पक्षका लागि थुनामा पठाएको थियो। जिल्लाको आदेशविरूद्ध सन्दीपले उच्च अदालतमा पुनरावेदन गरे। पुस १८ गते उच्चले उनलाई २० लाख रुपैयाँ धरौटीमा सशर्त रिहा गर्न आदेश गरेको थियो।

विदेश जान नपाउने, काठमाडौं उपत्यका छाड्न परे प्रहरीलाई खबर गर्नुपर्ने, पीडित किशोरीसँग प्रत्यक्ष र अप्रत्यक्ष रूपमा सम्पर्क गर्न नपाउनेलगायत शर्त उच्चले राखेको थियो।

उच्चको आदेशविरूद्ध सन्दीप २०७९ फागुन १२ सर्वोच्च पुगे। फागुन १५ गते सर्वोच्चले उनलाई राष्ट्रिय खेलाडी भएको भन्दै विदेश जाने अनुमति दिएको थियो।

तर २०८० पुस १३ गते उनी जिल्लाबाट दोषी ठहर भएपछि खेलजीवनमा सक्रिय हुन पाएनन्। बुधबार आएको उच्चको फैसलासँगै उनी खेलमा फर्कन पाउने भएका छन्।