मनाइँदै ‘आइसिटी डे’

काठमाडौं– सरकारले राष्ट्रिय सूचना तथा सञ्चार प्रविधि दिवस ‘आइसिटी डे’ आज मनाउँदै छ। ‘सुरक्षित सूचना प्रविधि, सुशासन र समृद्धि’ नारासहित छैटौं ‘आइसिटी डे’ १७, १८ र १९ वैशाख तीन दिनसम्म विभिन्न कार्यक्रम गरेर मनाइने भएको हो।

राष्ट्रिय सूचना तथा सञ्चार प्रविधि मन्त्रालयका प्रवक्ता नेत्रप्रसाद सुवेदीका अनुसार सूचना प्रविधि क्षेत्रमा योगदान दिएकालाई सम्मान गरिनेछ। ‘सूचना प्रविधि प्रयोगबाट हुने साइबर अपराध कसरी रोक्न सकिन्छ भनेर अध्ययन गर्ने गरिन्छ’, उनले थपे, ‘सूचना प्रविधि प्रयोग गरेर देशको विकास र मुलुकको समृद्धि गर्न सकिने उद्देश्यले यो दिवस मनाउन थालिएको हो।’

सूचना विश्वसनीय र भरपर्दो खालको हुनुपर्ने भन्ने सोचका साथ यो दिवसको नारा तय गरिएको उनले जानकारी दिए। दिवस मनाउन मन्त्रालयका सचिव कृष्णबहादुर राउतको संयोजकत्वमा गठित मूल समारोह समितिको १० वैशाखमा बसेको बैठकले यस वर्ष मूल नारा पारित गर्दै मनाउने निर्णय गरेको थियो।

दूरसञ्चार सेवाप्रदायकमार्फत तीन दिनसम्म १७, १८ र १९ वैशाख रिङब्याक टोनका रूपमा ‘आइसिटी डे २०२३ भव्य रूपमा मनाऔं’ सन्देशका साथै आज बिहान मोबाइल प्रयोगकर्तालाई एसएमएसमार्फत पठाउने व्यवस्था मिलाउन नेपाल दूरसञ्चार प्राधिकरणलाई आग्रह गरिएको प्रचार उपसमितिले जनाएको छ।

नेपालमा २०२८ मा कम्प्युटर भित्रिएको थियो नेपालमा कम्प्युटर एसोसिएसन नेपाल (क्यान) को सन् १९९२ मा स्थापना भयो। सोही दिनलाई सूचना प्रविधि दिवसका रूपमा मनाउन थालिएको हो।