चितवन राष्ट्रिय निकुञ्जमा आठ वर्षमा २२० गैंडा मरे

चितवन– विगत आठ वर्षमा चितवन राष्ट्रिय निकुञ्ज र आसपास क्षेत्रमा गरी २२० गैंडा मरेका छन्। आर्थिक वर्ष २०७२/७३ देखि हालसम्म ती गैंडा मरेका हुन्।

निकुञ्जका अनुसार ६४ गैंडा बूढो भएर र भीरबाट लडेर मरेका छन् भने १९ गैंडा दलदलमा फसेर र बाढीले बगाएर मरेका हुन्। निकुञ्जका सूचना अधिकारी गणेशप्रसाद तिवारीका अनुसार आपसमा जुधेर आठ वर्षको समयमा ५१ गैंडा मरेका छन्।

यस्तै, बाघको आक्रमणबाट २०, चोरी सिकारीबाट ९, करेन्ट लागेर आठ, बिरामी तथा रोगी भएर १२, खाडलमा परी तीन, विष सेवनले पाँच तथा कारण नखुलेका २९ गैंडा रहेको उनले जानकारी दिए।

तिवारीका अनुसार विगत आठ वर्षमा १०० भाले र ७६ पोथी गैंडा मरेका छन् भने लिंग पहिचान नभएका ४४ गैंडा मरेका छन्। आर्थिक वर्ष २०७२/७३ देखि यता निकुञ्जमा सबैभन्दा बढी गैँडा आव २०७५/७६ मा मरेको कार्यालयको तथ्यांकले देखाएको छ। सो आवमा ४३ गैंडा मरेका थिए।

सबैभन्दा कम आव २०७२/७३ मा १४ गैंडा मरेको तिवारीले बताए। तिवारीका अनुसार आव २०७३/७४ मा २५, आव २०७४/७५ मा २६, आव २०७६/७७ मा २६, आव २०७७/७८ मा ३३ र आव २०७८/७९ मा ३७ गैंडा मरेका छन्।

चालू आवको हालसम्म १६ गैंडा मृतावस्थामा भेटिएको उनले जानकारी दिए। निकुञ्जको तथ्यांकअनुसार आव २०६५/६६ देखि आव २०७९/८० सम्म ३२३ गैंडा मरेका छन्। निकुञ्जमा गैंडाको संख्या बढ्दै जाँदाआपसमा जुधेर र बूढो भएर मर्नेको संख्या धेरै रहेको तिवारीले बताए।

गैंडाको चरनका लागि निकुञ्जले घाँसेमैदान व्यवस्थापन र पानीको संरक्षणमा विभिन्न कार्यक्रम सञ्चालन गर्दै आएको उनले जानकारी दिए।