नेपाली नागरिकता बनाएर काठमाडौँमा व्यापार, १० भारतीय पक्राउ

काठमाडौँ- नेपाली नागरिकता लिएको आरोपमा १० भारतीय नागरिक काठमाडौँबाट पक्राउ परेका छन्। काठमाडौं उपत्यका अपराध अनुसन्धान कार्यालयले शनिबार उनीहरूलाई शंखमूल, कलंकी, बागबजार र बानेश्वरबाट पक्राउ गरेको हो।

पक्राउ पर्नेमा ५५ वर्षीय भरतप्रसाद गुप्ता, ३० वर्षीय राहुल गुप्ता, ५० वर्षीया ज्ञानमतिदेवी गुप्ता, ३९ वर्षीय गोपाल गुप्ता, ४४ वर्षीय रामसुन्दर गुप्ता, ४३ वर्षीय रामप्रवेश गुप्ता, ४६ वर्षीय भरत गुप्ता, ४२ वर्षीया स्नेहलता गुप्ता, ४९ वर्षीया मीनादेवी गुप्ता र ५२ वर्षीय राजेशकुमार गुप्ता छन्। उनीहरू सबै भारत उत्तर प्रदेशको बलिया इब्राहिमपट्टीका बासिन्दा हुन्।

उनीहरूको साथबाट नेपाली नागरिकताको प्रमाणपत्र, मतदाता परिचयपत्र र काठमाडौंमा बसाइँसराइ गरेको प्रमाणपत्रसहित भारतीय दूतावासले प्रदान गरेको भारतीय नागरिक भएको सिफारिसपत्र, भारतीय सवारीचालक अनुमतिपत्र, भारत सरकार आयकर विभागको कार्ड, भारतीय पासपोर्ट र आधार कार्ड बरामद भएको प्रहरीले जनाएको छ।

प्रहरी उपरीक्षक रेग्मीका अनुसार पक्राउ परेका भारतीय नागरिकले सिराहा, बारा, पर्सा, रुपन्देहीलगायतका जिल्लाबाट नेपाली नागरिकता लिएको पाइएको हो।

उनीहरूले नेपालका विभिन्न स्थानमा घरजग्गा खरिद गरी व्यापार व्यवसायसमेत गरी बसेको पाइएको प्रहरीले जनाएको छ। नेपालमा वंशजको आधारमा नै नागरिकता बनाए विभिन्न स्थानमा व्यापार व्यवसाय समेत गर्दै आएको भेटिएको प्रहरीको भनाइ छ।