सेवाघरको स्थायित्वको जिम्मेवारी अब चाँगुनारायणको

भक्तपुर- चाँगुनारायण नगरपालिकाका अनाथ तथा असहाय नागरिकको स्थायित्वको जिम्मेवारी अब नगरपालिकाले लिने भएको छ। मानव कल्याण समाज (सेवा घर)को पाँचौँ वार्षिकोत्सव कार्यक्रममा नगरपालिकाका प्रमुख जीवन खत्रीले यस्तो घोषणा गरेका हुन्।

‘यहाँ आउनु अगाडि ८-१० लाख सहयोगको घोषणा गरौँला भनेर आएको थिएँ। तर यहाँको अवस्था देख्दा यसको स्थायित्व नै गरेर जानुपर्ने देखेँ,’ उनले थपे, ‘त्यसैले यसका लागि स्थायी भवन निर्माण गर्न आवश्यक जग्गा र भवन निर्माणको काम आउँदो वर्षबाटै सुरु हुने गरी आउँदो बजेटमा व्यवस्था गर्ने गरी अगाडि बढ्नेछौँ। अब यसको स्थायित्वको जिम्मेवारी नगरपालिकाले लिन्छ।’

आश्रममा रहेका ५० अनाथ असहायलाई भोजनको व्यवस्था गर्दै उनले थप ९ हजार आर्थिक सहयोगसमेत प्रदान गरेका थिए। कार्यक्रममा चाँगुनारायण नगरपालिका–२ का वडाध्यक्ष सोम प्रधानले अनाथ, असहाय, सडक मानवको उद्धार गरी समाजमा पुनःस्थापना गर्ने र आश्रय दिने काम सहज नभएको भन्दै यस्तो पुण्य कामलाई सबैको सहयोग आवश्यक रहेको बताए।

मानव कल्याण समाजकी अध्यक्ष सुमित्रा चौलागाईँले आठ वर्षअघि सात जना सडक मानवलाई सडकमै गएर खाना खुवाएर सुरु गरिएको यो अभियान भक्तपुरसहित काभ्रे, काठमाडौँ, दाङ र बाराका छवटा शाखामा ३५० जनालाई उद्धार गरी व्यवस्थितरूपमा राखिएको जानकारी दिइन्।