मृत्युको मुखबाट निस्किएर फेरि अमेरिकी राष्ट्रपति बने ट्रम्प, कहिले छिर्छन् ह्वाइटहाउस?

अमेरिकी राष्ट्रपति चुनावमा डोनाल्ड ट्रम्प निर्वाचित भएका छन्। जितका लागि आवश्यक २७० इलेक्टोरल कलेज भोट चाहिने भएपनि नतिजा सार्वजनिक हुने क्रम जारी रहेकै अवस्थामा ट्रम्पले २७९ इलेक्टोरल भोट हासिल गरेर अमेरिकी सत्ता सम्हाल्ने तय गरेका हुन्।

उनी अमेरिकाको ४७औँ राष्ट्रपतिमा निर्वाचित भएका हुन्। ४ वर्षपछि ट्रम्पलाई ह्वाइटहाउसले स्वागत गर्ने तय भएको छ।

एउटा निर्वाचनमा पराजित भएर पुनः चार वर्षपछि सत्तामा फर्कने ट्रम्प एक शताब्दीभन्दा बढी समययताका पहिलो राष्ट्रपति बनेका छन्।

निर्वाचनमा उम्मेदवार बनेसँगै ट्रम्प चर्चामा थिए। ट्रम्पमाथि दुई पटक हत्याको प्रयास गरिएको थियो। पेन्सिल्भेनियामा एक बन्दुकधारीले उनको हत्या गर्ने प्रयास गरेका थिए। उनलाई ताकेर हानिएको गोली उनको कानमा लागेर रगत आएको थियो।

मे महिनामा ट्रम्पमाथि एक जना पोर्न स्टारलाई चुप राख्न उनले रकम दिएको खुलासा भएको थियो। त्यसका लागि उनले कागजपत्रहरू कीर्ते गरेको आरोप पनि लागेको थियो।

ट्रम्पमाथि अहिले पनि गएको राष्ट्रपतीय चुनावमा आफ्नो पराजय उल्ट्याउन गरेको प्रयासका लागि फौजदारी आरोपहरू छन्। तर उनी विजयी भए।

ट्रम्पकी प्रतिद्वन्द्वी कमला ह्यारिसले २१९ इलेक्टोरल भोट पाएकी छन्।

ट्रम्पले अमेरिकाका सातमध्ये ४ स्विङ स्टेट्समा जित हात पारे। जर्जिया, नर्थ क्यारोलाइना, विस्कन्सिन र पेन्सिलभेनियाको नतिजाले उनलाई साथ दिएको हो।

अमेरिकामा ५३८ इलेक्टोरल कलेज भोट हुने व्यवस्था छ। जसको बहुमतका लागि २७० भोट आवश्यक पर्छ। यो सीमा उनले सहजै कटाइसकेका छन्।

जर्जिया र नर्थ क्यारोलाइनमा १६-१६ इलेक्टोरल भोट छन्। पेन्सिलवेनियामा १८ इलेक्टोरल कलेज भोट छन्।

ट्रम्पको जितले विश्व अर्थतन्त्रमा हलचल, सेयरसँगै डलर र बिटक्वाइनको मूल्य बढ्यो

मतदानअघि र पछिका चुनावी ‘एक्जिट पोल’ले कमला डेमोक्रेटिक उम्मेदवार वर्तमान उपराष्ट्रपति कमला ह्यारिस आगामी राष्ट्रपति बन्ने आकलन गरेका थिए। तर नतिजा भने त्यसको उल्टो आएको छ।

दोस्रो पटक ट्रम्प अमेरिकाको राष्ट्रपति चुनिएका हुन्। सन् २०१६ मा उनी डेमोक्रेटिक पार्टीकी उम्मेदवार हिलारी क्लिन्टनलाई पराजित गर्दै अमेरिकी राष्ट्रपति बनेका थिए। तर सन् २०२० मा डेमोक्रेट उम्मेदवार जो बाइडेनले पराजित गरेका थिए।

यसअघिको शासनकालमा उनले उत्तर कोरियाली शासक किम जोन उनसँग वार्ता गरेका थिए। यो विषय विश्वभरका मिडियाले प्राथमिकताका साथ प्रकाशन तथा प्रसारण गरेका थिए। ट्रम्पको स्वभाव मुढी भएको धेरैले बताउने गरेका छन्।

ट्रम्पले विजेता बनेर बधाई लेनदेन गरिरहेको अवस्था भएपनि अमेरिकी चुनाव आयोग ‘फेडरल इलेक्सन कमिसन’ले उनी राष्ट्रपतिमा निर्वाचित भएको प्रमाणित गर्न बाँकी छ। केही राज्यहरूको नतिजा प्राप्त हुने क्रम पनि जारी छ।

निर्वाचित हुनका लागि आवश्यक इलेक्टोरल भोट प्राप्त गरेपनि ट्रम्पले तत्कालै कार्यभार सम्हाल्न भने पाउनेछैनन्। यसका लागि उनले सन् २०२५ सम्मलाई पर्खनुपर्छ। जनवरी २० मा मात्र उनले राष्ट्रपति पदको शपथ लिनेछन्। यसपछि उनको यात्रा ह्वाइटहाउसतर्फ सोझिनेछ।