सांसदहरूलाई बालेनको सुझाव : भ्रष्टलाई सिधै लगेर बागमतीमा चोपल्नुहोस्

काठमाडौँ- काठमाडौँ महानगरपालिकका मेयर बालेन्द्र साह (बालेन)ले भ्रष्टहरूलाई लगेर सिधै बागमतीमा चोपल्न सांसदहरूलाई सुझाव दिएका छन्। शनिबार साँझ फेसबुकमा स्टाटस लेख्दै मेयर बालेनले यस्तो सुझाव दिएका हुन्। आन्दोलन गर्न छोडेर भ्रष्टाचार न्यूनीकरण गर्ने कानुन बनाउन, भ्रष्टलाई कारबाही गर्न उनको सुझाव छ।

‘भ्रस्टाचारविरुद्धको आन्दोलन?‍? को नेता हो थाहा छ? घर कहाँ हो थाहा छ? सिधै लगेर बागमतीमा चोपल्नुस्,’ बालेनले भनेका छन्।

शनिबार भएको भ्रष्टाचारविरुद्धको आन्दोलनमा सांसद नेताहरू सहभागी भएका थिए। रास्वपा सभापतिसमेत रहेका सांसद रवि लामिछाने, नेसपाका अध्यक्षसमेत रहेका सांसद डा बाबुराम भट्टराई, रास्वपा सांसद डा तोषिमा कार्कीलगायतका सांसदहरूले भ्रष्टाचार विरुद्धको आन्दोलनमा सहभागिता जनाएका थिए। जनताले भारी मत दिएर जिताइसकेपछि भ्रष्टलाई सिधै कारबाही गर्नुपर्ने र त्यस्तो नीति बनाउनुपर्ने उनले उल्लेख गरेका छन्।

नयाँ नेताहरूले पनि भ्रष्टाचारीलाई कारबाही गर्ने गरी कानुन बनाउनभन्दा भ्रष्टाचारविरुद्धको आन्दोलनमा सहभागिता जनाउन थालेको भन्दै रोष प्रकट गरेका छन्। आन्दोलन गर्नका लागि मात्र भोट दिएर जनताले नजिताएको उनको भनाइ छ।

‘यस्तो सडक नाटक धेरै देखिसक्यौँ हामीले। पत्याउदिनँ म चाहिँ,’ चुनाव जितेर सांसद बनेका नेताहरूप्रति संकेत गर्दै उनले लेखेका छन्, ‘तपाईँहरुलाई यत्रो भोट दिएर नेता बनाको आन्दोलन गर्नलाई हैन, सिधै कारबाही गर्नलाई हो, सिधै कारबाही गर्ने नीति बनाउनलाई हो।’

मेयरमा निर्वाचित भएलगत्तै पुराना नेताहरूका गतिविधिप्रति असन्तुष्टि जनाउँदै आएका काठमाडौँ महानगरपालिकाका मेयर बालेन्द्र साह (बालेन) ‘नयाँ नेता’हरू प्रति पनि असन्तुष्टि व्यक्त गर्न थालेका छन्। ११ दिनअघि ‘नयाँ पुराना सबै नेतालाई चोर’को संज्ञा दिएका मेयर बालेन्द्रले शनिबार पनि नयाँ नेता (त्यत्रो भोट दिएर जनताले जिताएका)हरूप्रति असन्तुष्टि व्यक्त गरेका हुन्।

‘नयाँ , पुरानो सबै नेताहरु चोर हुन्,’ वैशाख १९ गते स्टाटस लेख्दै बालेनले भनेका थिए, ‘कसैलाई देशको माया छैन।’