दक्षिण कोरियामा १४ दिनमा ३ राष्ट्रपतिः २ जनालाई महाभियोग, अर्थमन्त्रीको काँधमा जिम्मेवारी

एजेन्सी – प्रधानमन्त्री तथा कार्यवाहक राष्ट्रपति हान दुक सुलाई शुक्रबार दक्षिण कोरियाको संसदमा महाभियोग लगाएर हटाइएको छ। उनको विपक्षमा १९२ मत परेको थियो। उनलाई पदबाट हटाउन १५१ मत मात्र काफी थियो।

सत्तारुढ दलले मतदान बहिष्कार गरेको थियो।

अब यहाँ अर्थमन्त्री चोई साङ मोकले कार्यवाहक राष्ट्रपतिको जिम्मेवारी सम्हाल्नेछन्। चोई सोङले डिसेम्बर ३ मा देशमा ‘मार्शल ल’ लागू गरेको खुलेर विरोध गरेका थिए। उनले यसलाई देशको अर्थतन्त्रका लागि विनाशकारी भनेका छन्।

युन सुक योले ३ डिसेम्बरमा मार्शल ल लगाएका थिए। तर, प्रतिपक्षको प्रयासका कारण ६ घण्टामै यो स्थगन भएको थियो। विपक्षी दलले संसदमा मतदानमार्फत सैनिक कानुनको प्रस्ताव अवैधानिक घोषणा गरेको थियो।

यसपछि दक्षिण कोरियाका राष्ट्रपति युन सुक येओललाई महाभियोग लगाएर पदबाट हटाइएको हो। यसपछि १४ डिसेम्बरमा हान डक सूलाई कार्यवाहक राष्ट्रपति बनाइएको थियो। तर उनी पनि १३ दिन मात्रै यस पदमा रहन सके।

विपक्षी दलको हितमा सभामुखले गरे निर्णय

शुक्रबार दक्षिण कोरियाको संसदमा मतदानका क्रममा निकै हंगामा भएको थियो। सभामुखले कार्यवाहक राष्ट्रपतिलाई हटाउन सांसदहरूको ५० प्रतिशत मत आवश्यक पर्ने बताएका थिए। दक्षिण कोरियाको संसदको गणितअनुसार १ सय ५१ सांसदको मतले मात्र कार्यवाहक राष्ट्रपति हटाउन सकिने व्यवस्था छ।

संसदमा विपक्षी दलको १९२ सिट छ। यस्तो अवस्थामा कार्यवाहक राष्ट्रपतिलाई हटाउन सहज भएको थियो।

१०८ सिट मात्रै पाएको सत्तारुढ दलले यसको विरोध गरेको छ। यसअघि राष्ट्रपति युनलाई हटाउन २ सय सिट आवश्यक थियो। महाभियोग सफल भएपछि कार्यवाहक राष्ट्रपति हानले आफूले संसदको निर्णयको सम्मान गरेको बताएका छन्। तर सर्वोच्च अदालतको फैसला पर्खने बताएका छन्।