रियलको सानदार जित, २ गोलको अग्रता जोगाउन नसक्दा सिटी पराजित

काठमाडौँ – साविक विजेता रियल म्याड्रिडले च्याम्पियन्स लिगमा बुधवार जित हासिल गरेको छ।

साल्सबर्गलाई रियलले ५-१ ले पराजित गर्ने क्रममा रोड्रिगो र भिनिसियस जुनियरले समान २ र केलियन एम्बाप्पेले‌ १ गोल गरे। रोड्रिगोले २३ औं र ३४ औं मिनेटमा गोल गरेपछि रियलले पहिलो हाफमा २-० को अग्रता बनायो।

एमबाप्पेले ४८ औं मिनेटमा गोल गरे। जुनियरले ५५ औं र ७७ औं मिनेटमा गोल गरेपछि रियलले फराकिलो अग्रता लियो।

खेल सकिन ५ मिनेट बाँकी रहँदा बिड्सट्रुपले एक गोल फर्काए। ७ खेलबाट १२ अंकसहित रियल १६ औं स्थानमा उक्लिएको छ।

यता दुई गोलको अग्रता बनाएर पनि त्यसलाई टिकाउन नसक्दा म्यानचेस्टर सिटी पिएसजीसँग ४-२ गोलअन्तरले पराजित भएको छ। ज्याक ग्रिलिस र इर्लिङ हाल्याण्डले क्रमशः ५० र ५३ औं मिनेटमा गोल गरे पनि पिएसजीले घरेलु मैदानमा उत्कृष्ट कमब्याक गरेको थियो।

पिएसजीले ५६, ६०, ७३ र ९०+३ मिनेटमा लगातार चार गोल गरेको हो। सातमा तीन खेलमा जित निकालेको पिएसजी बल्ल १० अंक बनाएर २२ औं स्थानमा उक्लिएको छ।

अर्को खेलमा भने बलियो मानिएको जर्मन क्लब बार्यन म्युनिखले फेयनोर्डसँग ३-० को लज्जास्पद हार बेहोरेको छ। गएराति नै भएको खेलमा फेयनोर्डले २१, ४५‌+९ र ८९ औं मिनेटमा गोल गर्दै ११ औं स्थानमा उक्लिएको छ।

त्यसैगरी गएराति नै भएको खेलमा इन्टर मिलानले स्पार्टा प्राहालाई १-० को झिनो अन्तरले हराएको छ। लौटारो मार्टिनेजले १२ औं मिनेटमा गरेको एक मात्र गोल निर्णायक बन्दा इन्टर विजयी भयो।

यस्तै गए राति नै इटालियलन अर्को क्लब मिलानले स्पेनी क्लब गिरोनालाई १-० ले हराउँदा आर्सनलले डाइनामो जागरिबलाई ३-० ले हराएको छ।