अध्यादेश पारित गराउन जसपा नेपालले सहयोग गर्छ : कांग्रेस

काठमाडौँ- नेपाली कांग्रेसका प्रमुख सचेतक श्याम घिमिरेले अध्यादेश पारित गर्न जसपा नेपालले सहयोग गर्ने दाबी गरेका छन्।

जनता समाजवादी नेपालसहितको समर्थनमा अध्यादेश पारित हुने उनको भनाइ छ।

बिहीबार संसद् भवनमा बसेको संसदीय दलको बैठकपछि सञ्चारकर्मीहरूसँग कुराकानी गर्दै घिमिरेले यस्तो दाबी गरेका हुन्।

‘जसपा नेपालसहितको समर्थनमा अध्यादेश पारित हुन्छ,’ उनले भने, ‘यसमा कुनै लेनदेनको कुरा छैन। अध्यादेशका कन्टेन्टमा जाँदा विरोध गर्नुपर्ने कुनै कारण छैन। हिजो पनि उहाँहरूले प्रधानमन्त्रीलाई विश्वासको मत दिनु भएको हो। आज पनि अध्यादेश पारित गराउने पक्षमा उभिनुहन्छ।’

बैठकअघि जसपा नेपालका अध्यक्ष उपेन्द्र यादवले कांग्रेसका सभापति शेरबहादुर देउवालगायतका कांग्रेसका नेताहरूलाई भेटेका थिए।

देउवासँग भेट सकेपछि उपेन्द्र प्रधानमन्त्री केपी शर्मा ओलीसँग भेटका लागि बालुवाटार पुगेका छन्।

प्रतिनिधि सभामा सत्तारुढ दलहरू बहुमतमा भएपनि राष्ट्रिय सभामा उनीहरूलाई बहुमत पुर्‍याउन यादव नेतृत्वको जसपाको साथ चाहिएको छ। जसपा नेपालसँग राष्ट्रिय सभामा तीन जना सांसद छन्।