महिला क्रिकेटमा काठमाडौं च्याम्पियन, फुटबलमा मकवानपुरको विजयी सुरुआत

काठमाडौं(जेठ ८) – यशोदा विष्टको अलराउन्ड प्रदर्शनमा काठमाडौंले दोस्रो बागमती प्रदेश खेलकुदअन्तर्गत सोमबार महिला क्रिकेटको उपाधि जितेको छ। चितवनस्थित गौतम बुद्ध क्रिकेट मैदानमा सम्पन्न फाइनलमा काठमाडौंले घरेलु टोली चितवनमाथि ५७ रनको रबाफिलो जितसहित उपाधि उचालेको हो।

१२५ रनको लक्ष्य पछ्याएको चितवन १५ ओभर १ बलमा ६७ रनमै समेटिएपछि काठमाडौंले सहज जितसहित उपाधि उचाल्यो। काठमाडौंका बलर बिपिशा शाही र संस्कृति फुँयालले तीन तथा यशोदा विष्टले दुई विकेट लिँदै चितवनको इनिङ सस्तैमा समेटे। चितवनका लागि आरती बिडारीले २८ रनबाहेक अन्यले दोहोरो अंकमा रन बटुल्न सकेनन्।

त्यसअघि टस जितेर पहिले ब्याटिङ गरेको काठमाडौंले निर्धारित २० ओभरमा पाँच विकेट गुमाउँदै १२४ रनको योगफल खडा गरेको थियो। काठमाडौंका लागि यशोदा विष्टले सर्वाधिक ४३ रन जोड्दा विन्दा कटवाल ४० रनमा नटआउट रहिन्। चितवनकी हेलिशा गुरुङले दुई तथा सुमन खतिवडाले एक विकेट लिए। फाइनलमा अलराउन्ड प्रदर्शन गरेकी काठमाडौंकी यशोदा विष्ट प्रतियोगिताको उत्कृष्ट खेलाडी घोषित भइन्।

चितवनकी सुमन खतिवडा उत्कृष्ट ब्याटर र काठमाडौंकी संस्कृति फुँयाल उत्कृष्ट बलर घोषित भए।

पुरुष क्रिकेट मंगलबारदेखि चितवनस्थित गौतम बुद्ध क्रिकेट मैदानमै सुरु हुँदैछ। प्रतियोगितामा ११ जिल्लाको सहभागिता रहेको छ। रसुवा र सिन्धुली सहभागी छैनन्।

त्यस्तै, घरेलु टोली मकवानपुरले दोश्रो बागमती प्रदेश खेलकुदअन्तर्गत पुरुष फुटबलमा सोमबार विजयी सुरुआत गरेको छ। पिप्ले क्याम्पा रंगशालामा मकवानपुरले रसुवालाई ७–१ को फराकिलो गोलअन्तरले पराजित गर्‍यो। त्यस्तै नुवाकोटले सिन्धुपाल्चोकलाई ३–१ तथा ललितपुरले सिन्धुलीलाई पेनाल्टी सुटआउटमा ४–३ ले हराए।

गौरीटारमा भएको महिला फुटबलको पहिलो दिन चितवनले धादिङलाई २–१ तथा काठमाडौंले भक्तपुरलाई ५–० गोलले पाखा लगाए।