आईसीसीका चारै प्रमुख प्रतियोगिताको फाइनल पुग्ने विश्वकै पहिलो कप्तान

काठमाडौँ – च्याम्पियन्स ट्रफी–२०२५ को मंगलबार भएको पहिलो सेमिफाइनल खेलमा भारतीय क्रिकेट टोलीले अस्ट्रेलियालाई चार विकेटले पराजित गरेको छ । योसँगै भारत लगातार तेस्रो पटक प्रतियोगिताको फाइनलमा प्रवेश गरेको छ ।

यो खेलमा भारतका लागि विराट कोहलीले उत्कृष्ट इनिङ्स खेलेका थिए । उनको यो इनिङ्सले उनको नाम रेकर्ड बुकमा लेखेको छ । यो खेलपछि कोहली मात्र नभई इन्डिया र कप्तान रोहितले पनि धेरै कीर्तिमान बनाए ।

यस खेलमा अस्ट्रेलियाले पहिले ब्याटिङ गर्दै ४९.३ ओभरमा २ सय ६४ रन बनाएको थियो । यो लक्ष्य भारतले ४८.१ ओभरमा ६ विकेट गुमाएर पुरा गरेको थियो । कोहलीले ९८ बलमा ५ चौकाको मद्दतले ८४ रनको इनिङ खेले । उनको यो इनिङ भारतका लागि म्याच जित्ने इनिङ साबित भयो ।

यो जितपछि रोहित शर्मा आईसीसीका चारै प्रमुख प्रतियोगिताको फाइनलमा पुग्ने विश्वकै पहिलो कप्तान बनेका छन् ।

रोहितको नेतृत्वमा भारत आईसीसी टेस्ट च्याम्पियनसिप–२०२३ को फाइनलमा पुगेको थियो । यसपछि भारत एकदिवसीय विश्वकप–२०२३ र टी–२० विश्वकप–२०२४ मा पनि फाइनल पुगेको थियो । सन् २०२३ मा भारत पराजित भएको थियो र यो घाउ अस्ट्रेलियाले दिएको थियो । जहाँ सन् २०२४ मा भारतले दक्षिण अफ्रिकालाई हराएको थियो ।

दुबईमा भारतीय टोलीको यो लगातार नवौं जित हो। पछिल्ला १० खेलमा भारतले यस मैदानमा कुनै पनि खेल हारेको छैन। उसले नौ खेल जितेको छ भने एक खेल बराबरी भएको छ । भारत कुनै एक मैदानमा लगातार खेल जित्ने आधारमा दोस्रो स्थानमा छ। यसअघि डुनेडिनमा लगातार न्युजिल्यान्डले १० खेल जितेको छ ।

आईसीसी च्याम्पियन्स ट्रफीको नकआउट खेलमा अस्ट्रेलियाविरुद्ध भारतको यो तेस्रो जित हो । सन् १९९८ मा भारतले अस्ट्रेलियालाई क्वाटरफाइनलमा हराएको थियो । सन् २००० मा अस्ट्रेलिया क्वार्टरफाइनलमा भारतसँग पराजित भएको थियो । अब तेस्रो पटक पनि भारत जित निकाल्न सफल भएको छ ।

यसबाहेक भारतले पछ्याएको लक्ष्य पनि आईसीसी ओडीआई नकआउटमा अस्ट्रेलियाविरुद्धको सबैभन्दा ठूलो लक्ष्य हो।