आजदेखि प्रधानमन्त्री कप क्रिकेट प्रतियोगिता सुरु

काठमाडौँ –  प्रधानमन्त्री कप पुरुष क्रिकेट प्रतियोगिता आजदेखि सुरु हुँदैछ।

प्रधानमन्त्री कपका सम्पूर्ण खेलहरू लुम्बिनी प्रदेशको तीन वटा खेल मैदानमा हुने भएको छ। यसको लागि तीनवटै खेल मैदानसँगै प्रतियोगिताको सबै तयारी पूरा भएको छ।

प्रतियोगितामा आज तीन खेल हुनेछन्। बिहान ९ बजे कर्णाली र सुदूरपश्चिम घोराहीमा भिड्नेछन्। यस्तै सोही समयमा भैरहवामा बागमतीले एपीएफको सामना गर्नेछ। त्यसैगरी सिद्धार्थनगर रंगशालामा कोशी र लुम्बिनी भिड्ने छन्।

लुम्बिनी प्रदेश क्रिकेट संघको व्यवस्थापनमा हुने प्रतियोगितामा यस पटक ४६ वटा खेलहरू खेलाईने छ। यी सबै खेल रुपन्देहीमा रहेको सिद्धार्थ क्रिकेट रंगशाला, तिलोत्तमामा रहेको एकस्ट्राटेक ओभलक्रिकेट रंगशाला र दाङ्गको लमहीमा रहेको देउखुरी अन्तर्राष्‍ट्रिय रंगशालामा आयोजना हुनेछ।

लुम्बिनी प्रदेश क्रिकेट संघका अध्यक्ष सञ्जय गुरुङ्गका अनुसार यी सबै रंगशालामा प्रतियोगिता सञ्चालनको लागि आवश्यक सबै तयारी पूरा भइसकेको छ। प्रतियोगितामा ७ वटै प्रदेशका टोली र नेपाली सेना, नेपाल प्रहरी र सशस्त्र प्रहरीको विभागीय टोली सहित १० वटा टोलीहरूले सहभागिता जनाउँदै छन्।

यी सबै टोलीहरूले एक अर्कासँग खेल्नुपर्नेछ। गुरुङ्गकाअनुसार सबै रंगशालामा सबै टोलीले खेल्ने गरि प्रतियोगिताको तालिका मिलाइएको छ। यस अनुसार रुपन्देहीको सिद्धार्थ क्रिकेट रंगशालामा उद्घाटन र फाइनल खेल समेत गरि जम्मा १७ वटा खेलहरू हुनेछन्।

एक्स्ट्राटेक ओभलमा १५ र लमहिको देउखुरी रंगशालामा १४ वटा खेलहरू हुनेछन्। गुरुङ्गले प्रधानमन्त्री कप लुम्बिनीमा हुनुले यस क्षेत्रको क्रिकेटसंगै होटल, तथा पर्यटन व्यवसाय चलायमान हुने बताए।

यस अघि काठमाडौंंमा २ वटा मात्र खेल मैदान भएको कारण राउण्ड रोबिनको आधारमा प्रतियोगिता आयोजना गर्न नेपाल क्रिकेट संघलाई अप्ठ्यारो हुदै आएको थियो।

नेपाल क्रिकेट संघका उपाध्यक्ष रोशन सिंहले पिचलगायत सबै दृष्टिले लुम्बिनी प्रदेशका तीनवटै खेलमैदानहरू उत्कृष्ट भएको कारण क्यानले प्रतियोगिताको आयोजना निर्णय गरेको बताए।

काठमाडौं बाहिर पनि क्रिकेटको माहौल बनाउन र काठमाडौं बाहिर पनि क्यानले क्रिकेट गराउन सक्छ भन्ने अन्तर्राष्‍ट्रिय सन्देश दिन प्रतियोगितालाई पहिलो पटक बाहिर लगिएका सिंहले जानकारी दिए।

प्रतियोगिताको फाइनल खेल चैत्र १६ गते भैरहवा स्थित सिद्धार्थ क्रिकेट रंगशालामा आयोजना हुनेछ।