ज्ञानेन्द्र शाहीको दाबीः आदित्यनाथको फोटो प्रधानमन्त्रीकै सल्लाहकारले राख्न लगाएका हुन्

काठमाडौँ – पूर्वराजा ज्ञानेन्द्रलाई विमानस्थलमा स्वागतका लागि आइतबार भीडमा भारत उत्तरप्रदेशका मुख्यमन्त्री योगी आदित्यनाथको फोटो राखिएको विषयमा राप्रपा सचेतक ज्ञानेन्द्र शाहीले गम्भीर अभिव्यक्ति दिएका छन्।

प्रधानमन्त्री केपी शर्मा ओलीकै निर्देशनमा उनका प्रमुख सल्लाहकार विष्णु रिमालले आदित्यनाथको फोटो राख्न लगाएका पाइएको सांसदसमेत रहेका शाहीले फेसबुकमा लेखेका छन्।

‘हिजो राजाको स्वागतमा भारतका मुख्यमन्त्री योगि आदित्यनाथको फोटो स्वयम् प्रधानमन्त्री केपि ओलि ज्युको निर्देशनमा प्रधानमन्त्री ज्युका प्रमुख राजनीतिक सल्लाहकार बिस्ष्णु रिमालले राख्न लगाईएको पाईएको छ,’ उनले सोमबार बिहान फेसबुकमा लेखेका छन्, ‘नेपाली राष्ट्रिय झन्डा सहितको स्वागत कार्यक्रमलाई असर पार्नको लागि यस्ता कुकर्म गर्न थालेछन छि छि।’

विदेशीको एजेन्डा र सिद्धान्तमा पार्टी चलाउनेहरुले ठूलो कुरा गरेको देख्दा अचम्म लागेको र मार्क्स ,लेलिन ,माओ कुन देशका हुन ? भन्दै उनले प्रश्न पनि गरेका छन्।

हिजो विमानस्थलनजिक पूर्वराजा ज्ञानेन्द्रलाई स्वागत गर्ने क्रममा आदित्यनाथको फोटो प्रयोग भएपछि यसप्रति चौतर्फी चर्चासँगै आलोचना भएको थियो।