ट्रम्पले तोडे परम्परा, साउदीबाट थाले विदेश भ्रमण

रियाद– अमेरीकी राष्ट्रपति डोनाल्ड ट्रम्प साउदी अरबको रियाद आइपुगेका छन्। दोस्रो कार्यकालको पहिलो कूटनीतिक भ्रमणका लागि उनी मंगलवार साउदी अरब आइपुगेका हुन्।

योसँगै ट्रम्पले दोस्रो कार्यकालमा विदेश भ्रमणको परम्परा पनि तोडेका छन्। यसअघिका राष्ट्रपतिहरूले कार्यभार सम्हालेपछि मेक्सिको, क्यानडा वा बेलायतको भ्रमण गर्ने गरेका थिए। मेक्सिको र क्यानडा अमेरिकासँग सीमा जोडिएका देश हुन् भने बेलायतसँग अमेरिकाको लामो सम्बन्ध छ। तर यसपालि ट्रम्पले दुवै छिमेकी देशसँग सम्बन्ध सुमधुर बनाउन जोड दिएका छैनन्।

रियाद विमानस्थलमा मंगलबार अवतरण गरेका ट्रम्पलाई साउदीका युवराज मोहमद बिन सलमानले स्वागत गरेका थिए। स्वागत कार्यक्रम सम्पन्न भएसँगै उनले मोहम्मद बिनसँगै भेट गरेर औपचारिक रूपमा भेटघाटका कार्यक्रम सुरु गरेका छन्।

चारदिने भ्रमणका लागि मध्यपूर्वको भ्रमणमा आएका ट्रम्पले कतार र संयुक्त अरब इमिरेटस (युएई)को पनि भ्रमण गर्नेछन्। कतारले ट्रम्पलाई ४० करोड अमेरिकी डलर पर्ने जहाज उपहार दिने योजना बनाएको छ। अमेरिकी राष्ट्रपतिलाई प्राप्त भएको यो हालसम्मकै महँगो उपहार हो। यद्यपि यो जहाज तत्काल प्राप्त नभई ट्रम्प कार्यकालको अन्त्यतिर मात्र प्राप्त हुने बताइएको छ। तर जहाज उपहार लिने विषयमा अमेरिकी प्रतिपक्षी दलका सांसदहरूले विरोध गरेका छन् भने ट्रम्पले त्यसको बचाउ गरेका छन्।

मध्यपूर्वी देशमा भ्रमण गर्नुको मुख्य लक्ष्य आर्थिक लगानीको सुनिश्चितता गर्नू रहेको बताइएको छ। यद्यपि साउदी अरबले ठूलो मात्रामा अमेरिकाबाट हतियार किन्ने योजना बनाएकाले त्यसका लागि समझदारी पनि हुन सक्ने बताइएको छ। १०० अर्ब डलरबराबरका सैन्य सामग्री र हतियार साउदीलाई बेच्ने योजना ट्रम्पको छ। ट्रम्पको सम्मानमा विशेष भोजको आयोजना पनि गरिने भएको छ।

यो भ्रमणमा ट्रम्प इजरायल जाने छैनन्। बीबीसीका उत्तरअमेरिकी संवाददाता एन्थोनी जर्चरले यो भ्रमणलाई कूटनीतिक र रणनीतिक भन्दा पनि आर्थिक विषयमा केन्द्रित रहेको उल्लेख गरेका छन्।