एसएसपीले उद्घाटन गरे ग्वार्को ओभरपास, ओलीले थप्पडी बजाए [तस्बिरहरू]

ललितपुर- ललितपुरको ग्वार्कोमा निर्माण भएको ओभरपासको उद्घाटन भएको छ। शुक्रबार प्रधानमन्त्री केपी ओलीको उपस्थितिमा उपत्यका ट्राफिक प्रहरी प्रमुख एसएसपी नवराज अधिकारीले उद्घाटन गरेका हुन्। उद्घाटन भएसँगै ओभरपासमा सवारीसाधन सञ्चालनमा आएका छन्।

निर्माण थालेको ३९ महिनामा ओभरपासको काम सकिएको हो। इन्जिनियरिङ प्रोक्योरमेन्ट एन्ड कन्स्ट्रक्सन (ईपीसी) मोडलमा यसको ठेक्का गरिएको थियो। यसको ठेक्का आशिष-समानान्तर-रेलिगेर जेभीले १७ करोड ६ लाख ८८ हजार रुपैयाँमा लिएको थियो।

दुई वर्षभित्र काम सक्ने गरी २०७८ फागुनमा ओभरपास निर्माण सुरु भएको थियो। सुरुमा भएको सम्झौताअनुसार ओभरपास २०८० फागुन १२ भित्र तयार भइसक्नु पर्ने थियो। उक्त समयमा नसकिएपछि २०८१ असारसम्मका लागि म्याद थपियो। त्यो समयमा पनि काम सकिएन।

त्यसपछि २०८१ पुस ९ सम्मका लागि म्याद थपियो। पटक–पटक समय थप गर्दा पनि काम नसकिएपछि २०८१ पुस १० बाट निर्माण कम्पनीलाई जरिमाना तिराएर काम गराइएको थियो। कम्पनीले दैनिक ८८ हजार जरिमाना तिर्दै अहिले काम सकेको हो। कम्पनीले करिब ६ महिनासम्म दिनहुँ ८८ हजार रुपैयाँ जरिमाना तिर्नुपरेको छ।

तस्बिर : नेपाल फोटो लाइब्रेरी