न्युयोर्कको सडकलाई तेन्जिङ नामकरण

अमेरिका– अमेरिकाको न्यूयोर्क राज्यको क्विन्स बोरोको ७५ स्ट्रिटको ब्रोड वे र उडसाइडको सडकलाई पहिलो सगरमाथा आरोही तेन्जिङ नोर्गे शेर्पा नामकरण गरिएको छ।

उक्त सडकलाई नामकरणका लागि विगत ६ वर्षदेखि स्थानीयरूपमा सक्रिय रहेका युनाइटेड शेर्पा किदुंग र युएसएनेपाल क्लाइम्बर्स एसोसिएसनले सिटीसँग पहल गर्दै आएकामा गत अप्रिलमा न्युयोर्कको क्विन्सको डिस्ट्रिक २५ को सिटी काउन्सिलले अनुमति दिएको थियो।

क्लाइम्बर्स एशोसिएसन अध्यक्ष पासाङ निमा शेर्पाले भने, ‘सिटीको अनुमति पाएपछि हामीहरूले सगरमाथा दिवसकै दिन पारेर उक्त सडकमा तेन्जिङ शेर्पाको नाम राखेका हौं। हामी सगरमाथाको देशबाट आएर पहिलो सगरमाथा आरोहीकै नाममा न्युयोर्कजस्तो विशाल सिटीमा सडकको नामकरण हुनु गर्वको विषय हो।’ सोमबार आयोजित कार्यक्रमपछि प्रतिक्रिया दिँदै उनले भने, ‘यो हामी सम्पूर्ण आरोहीका लागि खुसीको क्षण त हो नै, नेपालीका लागि पनि गर्वको विषय हो।’

कार्यक्रममा सहभागी भएका र लामो समयदेखि न्यूयोर्कमा बस्दै आएका जनसम्पर्क समिति अमेरिकाका अध्यक्ष आनन्द विष्टले नेपालीको नाममा सडकको नामकरण हुनु सुखद् क्षण भएको टिप्पणी गरे। उनले भने, ‘सगरमाथाको देश भनेर हामी विश्वभरि चिनिन्छौँ, त्यसमा पनि प्रथम आरोही तेन्जिङ शेर्पाको नाममा सडकको नामकरण गर्न सहजीकरण गरिदिएकामा काउन्सिलका सदस्यलाई धन्यवाद ज्ञापन गर्न चाहन्छु।’

यस अगाडि प्रथम दक्षिण एसियालीमूलकी कंग्रेसवुमन जेनिफर राजकुमारले संकल्पपत्र पास गरेर मे २९ लाई सगरमाथा दिवसका रूपमा मान्यता दिलाउन सफल भएकी थिइन्। सोमबार ७०आँै सगरमाथा दिवस पनि मनाइएको छ।  सोमबार आयोजित कार्यक्रममा तेन्जिङ शेर्पाका छोरा नोर्बु तेन्जिङ नोर्गे, दामे तेन्जिङ नोर्गेसमेत सहभागी भएका थिए। नेपाली नियोगका प्रतिनिधि, नेपाली समुदायका अगुवालगायतको कार्यक्रममा सहभागिता थियो।

गणतन्त्र दिवस मनाइयो
गणतन्त्र दिवस स्थापना भएको अवसरमा अमेरिकाको राजधानी वाशिङ्टन डिसीमा झन्डोत्तोलनसहित कार्यक्रम गरिएको छ। अमेरिकाका लागि नेपालका राजदूत श्रीधर खत्रीले वाशिङ्टन डिसीस्थित नेपाली दूतावास परिसरमा एक समारोहबीच झन्डोत्तोलन गरे। सो अवसरमा नेपाली नियोगका उपप्रमुख कुमार खरेललगायत दूतावासका अधिकारी सहभागी थिए।

राजदूत खत्रीले गणतन्त्र दिवस अवसरमा शुभकामना सन्देश दिएका थिए। यसैगरी नेपाली महावाणिज्य दूतावास न्यूयोर्कमा गणतन्त्र दिवस अवसरमा कार्यक्रम आयोजना गरिएको थियो। कार्यक्रममा कार्यवाहक महावाणिज्यदूत विष्णु गौतमले आमन्त्रितलाई स्वागत गरेका थिए।