घर भत्किएको पीडा कम नहुँदै पहिरोले लियो दम्पतीको ज्यान

पर्वत- पर्वतको मोदी गाउँपालिका–३ देउरालीको लाङ्दी पहिरोमा पुरिएर दम्पतीको ज्यान गएको छ। गएरातिको पहिरोमा छविलाल विश्वकर्मा र उनकी श्रीमती विष्णुमतीको मृत्यु भएको हो।

स्थानीयवासी र सुरक्षाकर्मीले पुरिएको अवस्थामा ७८ वर्षीय छविलाल विश्वकर्मा र उनकी ७६ वर्षीय श्रीमती विष्णुमतीको शव भेटिएको जिल्ला प्रहरी कार्यालयका प्रहरी नायब उपरीक्षक रविन विष्टले जानकारी दिए।

गए रातिदेखि परेको भारी वर्षाका कारण आइतबार बिहान घरमाथिको कान्लोबारी खस्दा दम्पती पुरिएका थिए, भने उनीहरूकी २८ वर्षीया बुहारी पवित्रा हामफालेर ज्यान जोगाउन सफल भएकी थिइन्।

गतवर्ष यही समय ढिस्को खसेर पुरानो घरमा क्षति पुगेपछि उनीहरू छोराले बनाएको नयाँ घरमा सरेका थिए।

वडा नम्बर ३ का वडाध्यक्ष देवेन्द्रबहादुर क्षेत्रीका अनुसार आइतबार बिहानै खसेको पहिरोले बुढाबुढीलाई पुरेको हो भने बुहारीले भागेर ज्यान बचाउन सफल भएकी छन्।

घरपछाडिको भूगोल हेर्दा तत्काल पहिरोले बगाउने जस्तो नभए पनि गहिरिएर पहिरो आएपछि बुढाबुढी सुतेकै अवस्थामा पुरिएको वडाध्यक्ष क्षेत्रीको भनाइ छ। घरभन्दा माथि करिब १५ मिटर अग्लो ठाउँबाट गहिरिएर पहिरो खसेको हो।

घरमा आधाभन्दा बढी क्षति पुगेको छ, क्षति नपुगेको भागपट्टि रहेकी बुहारी भागेर बाँच्न सफल भएकी हुन्।

पर्वत मोदी गाउँपालिकाकै वडा नम्बर २ सँग जोडिएको ३ नम्बर वडाकै माझगाउँ वर्षासँगै पहिरोको त्रास छ।