दक्षिण एसियामा क्याम्ब्रिजका इन्टरनेसनल स्कुलको संख्या हजार नाघ्यो

काठमाडौँ- दक्षिण एसियामा एक हजारभन्दा बढी क्याम्ब्रिज इन्टरनेसनल स्कूलमा क्याम्ब्रिज युनिभर्सिटी प्रेस एन्ड एसेसमेन्टअन्तर्गतको इन्टरनेसनल एजुकेसन समूह पुगेको छ। क्याम्ब्रिजका इन्टरनेसनल एजुकेशन दक्षिण एसियाका सिनियर भाइस प्रेसिडेन्ट विनय शर्माले आफूहरूको उपस्थिति दक्षिण एसियामा मात्र १,००० भन्दा बढी विद्यालयसम्म पुगेको बताएका हुन्।

‘एक हजार विद्यालय पार गर्नु हाम्रो शिक्षा क्षेत्रमा नवप्रवर्तन, समावेशिता, र उत्कृष्टताको अभियानप्रति दृढ प्रतिबद्धताको प्रमाण हो,’ उनले भने। क्याम्ब्रिज कार्यक्रमले विद्यार्थीलाई जलवायु परिवर्तनदेखि एआईको उदयसम्म जस्ता विश्वव्यापी चुनौतीहरू सामना गर्न आवश्यक सीप, सोच, र आत्मविश्वास पनि दिन्छ। हामी हाम्रा विद्यालयहरूसँगै भविष्यको शिक्षालाई निर्माण गरिरहेको उनको जिकिर छ।

क्याम्ब्रिजले ३ देखि १९ वर्षसम्मका विद्यार्थीका लागि स्थानीय सन्दर्भअनुसार अनुकूलन गर्न मिल्ने पाठ्यक्रममा आधारित शिक्षा प्रदान गर्ने समूहको दाबी छ।

शिक्षकहरूको व्यावसायिक विकासमा समेत क्याम्ब्रिजले ध्यान दिएको बताइएको छ। सन् २०२६ को मार्चदेखि नयाँ चेकप्वाइन्ट परीक्षण सिरिज सुरु गर्ने योजना पनि सार्वजनिक गरिएको छ। यो उपलब्धिले भविष्यको शिक्षा निर्माणमा क्याम्ब्रिजको भूमिका थप मजबुत बनाएको शर्माको भनाइ छ।