‘अखण्ड भारत’विरुद्ध राप्रपा, भारतीय दूतावासअघि प्रदर्शन [फोटो फिचर]

काठमाडौँ- भारतले नेपाली भूभाग समेटेर अखण्ड भारतको नक्सा जारी गरेको विरोधमा राप्रपाको युवा संगठनले भारतीय दूतावास अगाडि प्रदर्शन गरेको छ। प्रदर्शनकारीले ‘हाम्रो देश प्राण भन्दा प्यारो छ’, ‘भारतीय विस्तारवाद, मुर्दावाद’ जस्ता नारा लगाएका थिए।

आइतबार उद्घाटन भएको भारतको नयाँ संसद् भवनमा ‘अखण्ड भारत’को नक्सा भित्तामा अंकित भएको विषयमा नेपालको सरकारी पक्ष मौन छ। प्रधानमन्त्री पुष्पकमल दाहाल प्रचण्डको भारत भ्रमण जेठ १७ देखि सुरु भएकाले नेपाल सरकारले यो विषयमा कुनै धारणा सार्वजनिक नगरेको हो।

प्रधानमन्त्रीको भारत भ्रमणको पूर्वसन्ध्यामा प्रतिक्रिया जनाउँदा प्रधानमन्त्रीको भ्रमणमा असर पर्ने भएकाले तत्काल यसमा कुनै प्रतिक्रिया नजनाउने रणनीति लिइएको परराष्ट्र स्रोतको भनाइ छ।

नक्सामा ‘अखण्ड भारत’ भन्दै नेपालको लुम्बिनी र पाकिस्तानको तक्षशीलासम्मका क्षेत्रलाई समावेश गरिएको छ। अखण्ड भारतमा भारतवर्षका पुराना राज्य र सहरलाई समावेश गरिएको बताइँदै आएको छ।

भारतीय सत्तारुढ दल भाजपाको मातृसंस्था राष्ट्रिय स्वयंसेवक संघ (आरएसएस)ले ‘अखण्ड भारत’मा हालको अफगानिस्तानदेखि थाइल्यान्डसम्मका भूभागलाई समेटिने बताउँदै आएको छ। यद्यपि यो विषय राजनीतिकभन्दा बढी सांस्कृतिक भएको भारतीय पक्षको दाबी छ।