अमेरिकाले ५० प्रतिशत भन्सार लगाउँदा पनि भारतमा डलर सञ्चिति बढेर पुग्यो ६ खर्ब ९५ अर्ब

अमेरिकाले ५० प्रतिशत भन्सार शुल्क (ट्यारिफ) लगाएपछि घटेको भारतको विदेशी मुद्राको सञ्चिति बढ्न थालेको छ। भारतको विदेशी मुद्रा सञ्चिति १.४८ अर्ब अमेरिकी डलरले बढेर ६ खर्ब ९५ अर्ब १० करोड डलर पुगेको भारतीय रिजर्भ बैंक (आरबीआई) को तथ्यांकले देखाएको हो।

गत वर्ष २०२४ को सेप्टेम्बर अन्त्यमा भारतको विदेशी मुद्रा सञ्चिति बढेर उच्च बिन्दूमा पुगेको थियो। त्यसबेला सञ्चिति बढेर ७ खर्ब ४ अर्ब ८८ करोड डलर पुगेको थियो।

यो साता सञ्चितिको प्रमुख घटक विदेशी मुद्रा सम्पत्ति १.९२ अर्ब डलरले बढेर ५ अर्ब ८५ अर्ब ९० करोड डलर पुगेको आरबीआईको तथ्यांक छ।

सामान्यतया, आरबीआईले समयसमयमा तरलता व्यवस्थापनमार्फत बजारमा हस्तक्षेप गर्दछ। आरबीआईले विदेशी विनिमय बजारलाई नजिकबाट निगरानी गर्छ। कुनै पनि पूर्वनिर्धारित लक्ष्य स्तर वा ब्यान्डको सन्दर्भ बिना विनिमय दरमा अत्यधिक अस्थिरतालाई नियन्त्रण गरेर व्यवस्थित बजार अवस्था कायम राख्न मात्र हस्तक्षेप गर्छ।

यता नेपालमा पनि पछिल्लो समय विदेशी विनिमय सञ्चिति २५.९ प्रतिशत वृद्धि भई २०८२ जेठ मसान्तमा २५ खर्ब ६९ अर्ब ३८ करोड पुगेको छ। अमेरिकी डलरमा यस्तो सञ्चिति जेठमा २२.२ प्रतिशत वृद्धि भई १८ अर्ब ६५ करोड पुगेको छ।