पूर्ण राज्यको मागसहित लद्दाखमा प्रदर्शन, केन्द्र सरकारले लगायो सोनम वाङ्चुकलाई दोष

नयाँदिल्ली। भारतको केन्द्र शासित प्रदेश लद्दाखलाई पूर्ण राज्यको दर्जा दिन माग गर्दै प्रदर्शनकारी र प्रहरीबीच भएको झडपमा चार जनाको मृत्यु भएको छ भने ३० प्रहरीसहित कम्तीमा ५९ जना घाइते भएका छन्। यो १९८९ पछि लद्दाखमा भएको सबैभन्दा हिंसात्मक दिन मानिन्छ।

बुधबारको हिंसापछि, वातावरणीय कार्यकर्ता सोनम वाङचुकले लद्दाखलाई पूर्ण राज्यको दर्जा र छैटौं अनुसूचीको विस्तारको माग गर्दै १५ दिने अनशन अन्त्य गरे।

हिंसालाई ध्यानमा राख्दै प्रशासनले लेहमा कर्फ्यू लगाएको छ। बुधबार राति अबेर एक विज्ञप्तिमा, केन्द्रीय गृह मन्त्रालयले बुधबारको हिंसाको लागि सोनम वाङचुकलाई दोषी ठहराएको छ।

वाङचुकले गृह मन्त्रालयको आरोपको जवाफ अहिलेसम्म दिएका छैनन्। केही व्यक्तिहरू पूर्ण राज्यको दर्जा र छैटौं अनुसूचीको विस्तारमा लद्दाखका जनतासँग भएको वार्तामा भएको प्रगतिबाट खुसी छैनन् र यसमा अवरोध पुर्‍याइरहेका छन् भनेर एक विज्ञप्ति जारी गर्दै केन्द्र सरकारले भनेको छ।

गृह मन्त्रालयले आफ्नो विज्ञप्तिमा भनेको छ, ‘केही मानिसहरूको स्वार्थी राजनीति र सोनम वाङचुकको व्यक्तिगत महत्वाकांक्षाका कारण लद्दाख र यसका युवाहरूले ठूलो मूल्य चुकाइरहेका छन्।’

बुधबार बिहान, युवाहरूको एक समूहले आगजनी र तोडफोड गरे। त्यसपछि उनीहरूले भाजपा मुख्यालयलाई निशाना बनाए र धेरै सवारी साधनहरू जलाए। अधिकारीहरूले समाचार एजेन्सी पीटीआईलाई बताएअनुसार स्थिति नियन्त्रण गर्न, शहरभरि ठूलो संख्यामा तैनाथ प्रहरी र अर्धसैनिक बलले अश्रुग्यास प्रहार गरेको थियो।

घाइतेमध्ये कम्तीमा छ जनाको अवस्था गम्भीर रहेकाले मृत्यु हुनेको संख्या बढ्न सक्ने आशंका गरिएको छ।