काठमाडौँ: काठमाडौं उपत्यकाको फोहोर व्यवस्थापन पुनः संकटमा परेको छ। बञ्चरेडाँडा ल्याण्डफिल साइटमा फोहोर विसर्जन रोकिएपछि काठमाडौं महानगरपालिकाले महानगरवासीलाई घरबाट फोहोर बाहिर ननिकाल्न आग्रह गर्दै सूचना जारी गरेको छ।
बञ्चरेडाँडा ल्याण्डफिल साइटमा फोहोर फाल्न स्थानीयवासीले अवरोध गरेपछि काठमाडौं महानगरपालिकाले शुक्रबार सूचना प्रकाशित गर्दै अर्को सूचना नआएसम्म घरमै फोहोर सुरक्षित राख्न अनुरोध गरेको हो।
महानगरको वातावरण व्यवस्थापन विभागद्वारा जारी सूचनामा भनिएको छ, ‘काठमाडौं उपत्यकाको फोहरमैला अन्तिम विसर्जनस्थल बञ्चरेडाँडा ल्याण्डफिल साइटमा फोहर विसर्जनमा अवरोध भएकोले फोहर विसर्जन गर्न नसकिएको हुँदा अर्को सूचना जारी नभएसम्म आफ्नो घरबाट निष्काशन हुने फोहरमैला घर/ कम्पाउण्डमा सुरक्षित तबरले राख्नुहुन र जथाभाबी सडक तथा सार्वजनिक स्थलमा नफाल्नुहुन अनुरोध छ।’
बुधबारदेखि नै ककनी गाउँपालिका, धुनिबेसी नगरपालिका र बेलकोटगढी नगरपालिकाका स्थानीयवासीले विगतमा भएका १८ बुँदे सहमति कार्यान्वयन नभएको भन्दै काठमाडौंको फोहोर साइटमा प्रवेश गर्न दिएका छैनन्।
स्थानीयवासी र जनप्रतिनिधिहरूले काठमाडौं महानगर र संघीय निकायले बारम्बार गरेका वाचा पूरा नगरेको आरोप लगाउँदै फोहोर नल्याउने अडान लिएका छन्। उनीहरूका अनुसार, दुर्गन्ध नियन्त्रण, लिच्चड व्यवस्थापन, स्वास्थ्य तथा पूर्वाधार सुधारका विषयमा सहमति भए पनि कार्यान्वयन कागजमै सीमित रह्यो।
ककनी गाउँपालिका–१ का वडाध्यक्ष पदमबहादुर श्रेष्ठ बलामीले स्थानीयको आन्दोलन न्यायोचित भएको भन्दै महानगरले तत्काल ध्यान नदिए अवस्था झन् विकराल हुन सक्ने चेतावनी दिएका छन्। यसअघि मेयर बालेन शाह स्वयं बञ्चरेडाँडा पुगेर स्थानीयसँग सम्झौता गरेका थिए। तर सम्झौता कार्यान्वयनमा ढिलाइ हुँदा पुनः फोहोर अवरोध दोहोरिएको हो।
हाल उपत्यकाभरको दैनिक झण्डै १२०० मेट्रिक टन फोहोर व्यवस्थापनमा ठप्प अवस्थासँगै सडक र टोलहरूमा दुर्गन्ध फैलिन सक्ने चिन्ता बढेको छ।
