ए डिभिजन लिग जित्ने १६औँ क्लब बन्यो चर्च बोइज

काठमाडौँ- चर्च बोइज युनाइटेड सहिद स्मारक ए डिभिजन लिगको उपाधि जित्ने १६औं क्लब बनेको छ। सन् २०११ मा सुरु भएको नेपालको शीर्ष डिभिजनको लिग जित्ने चर्च बोइज १६औं क्लब बनेको हो। सोमबार दशरथ रंगशालामा थ्रीस्टार क्लबसँग बराबरी खेलेको चर्चले थप एक अंक जोडेर उपाधि जितेको हो।

सहिद स्मारक लिग अन्तर्गत शीर्ष श्रेणीको उपाधि सबैभन्दा धेरै ८ पटक मनाङ मर्स्याङ्दी क्लबले जितेको छ। त्यस्तै, आरसीटीले ६ पटक उपाधि जितेको छ। नेपाल पुलिसले ५ पटक उपाधि जितेको छ। विभागीय टिम पुलिसले पहिले पुलिस फोर्सको नाममा खेल्ने गर्दथ्यो। तर अहिले उसको नाम नेपाल पुलिस रहेको छ। यी दुवै नामलाई जोडेर हेर्दा उसले पाँच पटक उपाधि जितेको हो।

चार पकट उपाधि जित्नेमा एनआरटी (एनआरटी एसँगै) रहेको छ। त्यस्तै, लिगको तीन उपाधि जित्ने तीन क्लब रहेको छन्। थ्रीस्टार, संकटा क्लब र र महावीर क्लबले अहिलेसम्म समान ३-३ पटक उपाधि जितिसकेका छन्।

त्यसैगरी, देउराली क्लब, अन्नपूर्ण क्लब र मछिन्द्रले समान २,२ पटक लिग जितेका थिए। सहिद स्मारक ए डिभिजन लिगमा समान एकएक उपाधि जित्ने क्लबमा सुनाखरी एथ्लेटिक्स, बोइज युनियन, फ्रेन्ड्स युनियन, विद्या व्यायाम, सैनिक ११ रहेका छन्।

अब एक उपाधि जित्ने क्लबमा चर्च बोइजको नाम पनि नेपाली फुटबलमा आउने भएको छ। ४४औं संस्करणको लिग चर्च बोइजले जितेर उसले नेपाली फुटबलको इतिहासमा आफ्नो नाम लेखाएको हो।

सोमबार उपाधि जित्ने क्रममा चर्च बोइजले गोल गर्न भने सकेन। फरवार्डमा अन्जन विष्ट, आषिश चौधरी, आशिष चापागाईंले अग्रपंक्तिमा रहेर गोलका लागि निकै राम्रा प्रयास गरे। कहिले गोल मिस भयो। कहिले थ्रीस्टारका गोलकिपर अरुण ब्लोनले बचाए। चर्च बोइजले गोल निकाल्न भने सकेन।

पहिलो हाफको १८औं मिनेटमा थ्रिस्टारका अजयी मार्टिन गोलकिपर प्रिसोसँग वान टू वानको अवस्थामा पनि गोल गर्न सकेनन्। थ्रिस्टारले खेलको २८ औं मिनेटमा पनि त्यस्तै गल्ती गर्‍यो। खेलमा दुवै टिमले गोलका निकै सुनौला अवसर सिर्जना गरे पनि गोल गर्न भने सकेनन्। यससँगै चर्च बोइजले थ्रिस्टारसँग अंक बाँडेको छ।

अहिले एक खेल बाँकी रहँदा चर्च बोइजको ४५ अंक भएको छ। दोस्रो स्थानमा रहेको मछिन्द्र क्लबको ३९ अंक रहेको छ। मछिन्द्रले दुवै खेलमा जित निकाले पनि ४५ अंक हुनेछ। तर ऊ चर्च बोइजभन्दा हेड टू हेडमा पछि रहनेछ।

त्यसैले चर्च बोइजले उपाधि जित्ने पक्का भएको हो। वि सं २०६६ मा स्थापना भएको क्लबले २०७७ मा सी क्वालिफायरमा छनोट भएको थियो। त्यसपछि यो क्लबले लगातार उपाधि जितिरहेको छ।

उसले गत वर्ष मात्र बी डिभिजन लिगमा जित निकालेको थियो। त्यो भन्दा अघिल्लो वर्ष मात्र चर्च बोइज सी डिभिजनबाट बी डिभिजनमा बढुवा भएको थियो। उसले लगातार तीन सिजनमा सी, बी र ए डिभिजन लिगको उपाधि जितेर मनाङको ऐतिहासिक कीर्तिमानसँग बराबरी गरेको हो।

वि सं २०६६ मा स्थापना भएको क्लबले फुटबल खेल्न थालेको १४ वर्षमै नेपालको शीर्ष डिभिजनमा उपाधि जितेको हो। तर यो कीर्तिमानी वर्ष भने होइन्। स्थापनाको पाँच वर्षमै मनाङले लिग जितिसकेको छ।

यता,आज बराबरी गरेपछि थ्रिस्टारले २९ अंक बनाएको छ। उसलाई अझैसम्म रेलिगेसनको भय रहेको छ। यद्यपि थ्रीस्टार रेलिगेसन जोनमा रहेको खुमलटारभन्दा दुई अंकले मात्र अघि रहेको छ।