डीएलए अध्यक्षमा केसी, महासचिवमा अधिकारी निर्वाचित

काठमाडौँ- नेपाल डेमोक्रयाटिक लयर्स एसोसिएसन (डीएलए)को ११औँ महाधिवेशनले सीताराम केसीको नेतृत्वमा ४३ सदस्यीय नयाँ कार्यसमिति चयन गरेको छ। केसीले ६५३ मत प्राप्त गर्दा उनका निकटतम प्रतिस्पर्धी लक्ष्मीदेवी दाहाल रावलले १७७ मत प्राप्त गरिन्।

यस्तै अध्यक्ष पदका अर्का उम्मेदवार केदार कार्कीले एक सय ३०, लक्ष्मण थपलियाले ५५ र कृष्ण घिमिरे भुसालले ५३ मत प्राप्त गरे। बिहान सम्पन्न मतगणनाअनुसार वरिष्ठ उपाध्यक्षमा जगन्नाथ ढकाल विजयी भएका छन्। ढकालले ३१५ मत पाउँदा उनका निकटतम् प्रतिस्पर्धी चन्द्रमणि अधिकारीले २६४ मत पाए।

महिला उपाध्यक्षमा कविता थापा कार्कीले ६१९ मत प्राप्त गरी विजयी भइन्। प्रतिस्पर्धी दीना श्रेष्ठले ४१२ मत प्राप्त गरिन्। यस्तै बागमती प्रदेश उपाध्यक्षमा जनराज श्रेष्ठ, कोशी प्रदेश उपाध्यक्षमा कविता बस्नेत, मधेश प्रदेश उपाध्यक्षमा रामानन्द साह, गण्डकी प्रदेश उपाध्यक्षमा भूमिश्वर शर्मा गौतम, लुम्बिनी प्रदेश उपाध्यक्षमा विष्णुप्रसाद धिताल, कर्णाली प्रदेश उपाध्यक्षमा पदमबहादुर शाही र सुदूरपश्चिम प्रदेश उपाध्यक्षमा गङ्गाराम पाध्याय निर्विरोध निर्वाचित भएको निर्वाचन समितिका संयोजक हेमराज नेपालले जानकारी दिए।

समितिका संयोजक नेपालका अनुसार महासचिवमा ज्ञानेन्द्रप्रसाद अधिकारी विजयी भए। ३९५ मत प्राप्त गर्दा उनका निकटतम् प्रतिस्पर्धी पूर्णप्रकाश बस्नेतले २३६ मत पाए। सचिवमा शिवप्रसाद रेग्मी, महिला सचिवतर्फ धनमाया राना, कोषाध्यक्षमा हरिबहादुर बस्नेत निर्वाचित भएका छन्।

महाधिवेशनमा देशभरका ८८ एकाइका प्रजातान्त्रिक पक्षधर १३ हजार कानुन व्यवसायीमध्येबाट एक हजार चार सय १० जना महाधिवेशन प्रतिनिधि सहभागी भएका थिए। यसमध्ये एक हजार ६१ मत खसेको थियो। महाधिवेशनको यही जेठ २६ गते नेपाली कांग्रेसका सभापति शेरबहादुर देउवाले उद्घाटन गरेका थिए।