एक्सले कन्टेन्ट क्रियटरलाई युट्युबभन्दा बढी पैसा दिने

एजेन्सी: सामाजिक सञ्जाल प्लेटफर्म एक्स (पूर्व ट्विटर) का मालिक एलन मस्कले कन्टेन्ट क्रिएटरलाई दिइने भुक्तानी उल्लेख्य रूपमा बढाउने संकेत गरेका छन्। मस्कको यो कदम सफल भएमा एक्सले कन्टेन्ट क्रिएटरलाई दिने आम्दानी युट्युबभन्दा पनि बढी हुनेछ।

इन्टरनेटमा आर्टिफिसियल इन्टेलिजेन्स (एआई) तथा लार्ज ल्याङ्ग्वेज मोडल (एलएलएम) बाट उत्पादन हुने सामग्रीको प्रभाव बढ्दै गएको सन्दर्भमा मस्कले मौलिक कन्टेन्टको संरक्षण आवश्यक रहेको बताएका छन्। हालै एक प्रयोगकर्ताले ‘भुक्तानी नगर्ने प्लेटफर्महरू एआईले कन्टेन्ट खाइरहेको अवस्थामा अप्रासंगिक बन्दै जानेछन्,’ भन्दै गरेको टिप्पणीमा प्रतिक्रिया दिँदै मस्कले भनेका छन्, ‘ठिक छ, हामी यो गर्छौँ, तर कुनै पनि किसिमको ठगी हुन नदिन कडा नियम लागू गरिनेछ।’

कस्तो छ मस्कको नयाँ योजना?
मस्कको योजनाअनुसार कन्टेन्ट क्रिएटरलाई बढी भुक्तानी दिइनेछ, तर त्यसका लागि कडा मापदण्ड लागू गरिनेछ। एक्सले हालैदेखि विज्ञापन आम्दानी क्रिएटरसँग बाँड्दै आएको छ भने अब उक्त रकम अझ बढाउने तयारी गरिएको छ। तर, बढी आम्दानीको लोभमा बट प्रयोग गर्ने वा नक्कली एङ्गेजमेन्ट बढाउनेहरूलाई कडा कारबाही गरिने मस्कले चेतावनी दिएका छन्।

साथै, बढेको भुक्तानी सुविधा एक्स को  प्रिमियम प्लस सदस्यता लिने क्रिएटरहरूलाई मात्र उपलब्ध हुन सक्ने संकेत पनि गरिएको छ। एक्सकी प्रोडक्ट प्रमुख निकिता बियरले मस्कको योजनालाई समर्थन गर्दै ९९ प्रतिशतसम्म ठगी रोक्ने नयाँ प्रणाली विकास भइरहेको बताएकी छन्। यस प्रणालीमार्फत वास्तविक, गुणस्तरीय र मौलिक कन्टेन्ट बनाउने क्रिएटरले मात्र फाइदा पाउनेछन्।

लामो समयदेखि युट्युब कन्टेन्ट क्रिएटरहरूको मुख्य आम्दानी स्रोत रहँदै आएको छ। फेसबुक र इन्स्टाग्रामले पनि फेसबुक प्रयोगकर्तालाई आम्दानीको विकल्प दिएको छ। मस्कको योजना सफल भएमा एक्सले क्रिएटरलाई ठूलो आर्थिक प्रोत्साहन दिनुका साथै आफूलाई भिडियो-केन्द्रित र क्रिएटर-मैत्री प्लेटफर्मका रूपमा स्थापित गर्न सक्ने विश्लेषण गरिएको छ।