कांग्रेसको विशेष महाधिवेशन अपरिहार्य, बहुमत प्रतिनिधिको माग अवैधानिक भन्नु आपत्तिजनक: आचार्य

काठमाडौँ:नेपाली कांग्रेसका नेता तथा पूर्वअर्थमन्त्री महेश आचार्यले वर्तमान अवस्थामा नेपाली कांग्रेसको विशेष महाधिवेशन अपरिहार्य भएको बताएका छन्। भदौ २३ र २४ पछि देशको गम्भीर बन्दै गएको अवस्थासँगै कांग्रेसको पार्टी विधानको निरन्तर बेवास्ता, नीतिगत अन्योल, सांगठनिक दुरावस्था र नेतृत्वको वर्तमान संकटले पार्टीको विशेष महाधिवेशन अपरिहार्य बनाएको उनले बताएका छन्।

सामाजिक सञ्जालमा टिप्पणी गर्दै विधानत: आफू जवाफदेही हुनुपर्ने महाधिवेशनका बहुमत प्रतिनिधिको माग र अग्रसरतालाई ‘अवैधानिक’ भन्ने जस्ता निर्णय र प्रचार त्रुटीपुर्ण र आपत्तिजनक भएको उनको भनाइ छ। वस्तुत: कार्य सम्पादन समितिका सबै निर्णय केन्द्रीय कार्य समितिबाट अनुमोदन गराउनुपर्ने निर्णय हुन र अहिले कार्य समितिको बैठक समेत बोलाउन छाडिएको अवस्था रहेको भन्दै उनले चिन्ता व्यक्त गरेका छन्।

कांग्रेस विधानले केन्द्रीय समिति होइन, ‘केन्द्रीय महाधिवेशन’लाई पार्टीको सर्वोच्च निकाय मानेको उनको भनाइ छ। विधानले केन्द्रीय समितिलाई पार्टीको कोष, लेखा परीक्षण प्रतिवेदन, संसदीय दलको प्रतिवेदनलगायत सबै प्रस्ताव महाधिवेशनमा पेस गर्न बाध्यकारी व्यवस्था गरेको स्मरण गराउँदै कार्यसमितिले प्रस्तुत गरेका विषयमा छलफल र निर्णय गर्ने अधिकार पनि महाधिवेशनलाई नै दिएको उनले बताएका छन्।

साथै पार्टीका अल्पकालिन तथा दीर्घकालिन नीति निर्धारण र संगठनसम्बन्धी नीतिगत निर्णय गर्ने अधिकार महाधिवेशनमै सीमित रहेको पनि उनको भनाइ छ।

आचार्यका अनुसार विधानले महाधिवेशनका कम्तीमा १० प्रतिशत प्रतिनिधिलाई केन्द्रीय कार्यसमितिका कुनै पनि निर्णय पुनरावलोकनका लागि प्रस्ताव राख्न सक्ने अधिकार दिएको छ। यसले केन्द्रीय कार्य समितिलाई नीतिगत र सांगठनिक विषयमा एकल ढंगले निर्णय गर्न रोक लगाएको र महाधिवेशनप्रति जवाफदेही बनाएको उनले बताएका छन्।