बालेनले ओलीको क्षेत्रबाट चुनाव लड्ने लगभग निश्चित, माघ ४ गते मेयरबाट राजीनामा दिएर झापा जाँदै

काठमाडौँ: पूर्वप्रधानमन्त्री तथा नेकपा एमालेका अध्यक्ष केपी शर्मा ओलीलाई काउन्टर दिनेगरी काठमाडौँ महानगरपालिकाका मेयर बालेन्द्र शाह (बालेन)ले तयारी थालेका छन्। बालेनले माघ ४ गते मेयर पदबाट राजीनामा दिएर त्यसको दुई दिनपछि झापा जाने तयारी गरिरहेका छन्। उनले झापा ५ बाट प्रतिनिधिसभा उम्मेदवारका रूपमा उम्मेदवारी दिने निश्चित भएको राष्ट्रिय स्वतन्त्र पार्टी (रास्वपा)का केन्द्रीय सदस्य मधुसूदन ढकालले जानकारी दिएका छन्।

निकटस्थहरूका अनुसार बालेनले अघिल्लो सातादेखि नै झापाबाट चुनाव लड्ने मनस्थितिका साथ तयारी थालेका छन्। उनले माघ ४ गते महानगरपालिकाको मेयर पदबाट राजीनामा दिने तयारी गरेको उनीनिकट स्रोतको दाबी छ। त्यसलगत्तै उनी चुनावी तयारीका लागि झापा जानेछन्। चुनाव अवधिसम्म अधिकांश समय झापामै रहेर उनी प्रचारप्रसारमा व्यस्त रहने उनी निकटस्थहरू बताउँछन्।

काठमाडौँ महानगरपालिकामा स्वतन्त्र उम्मेदवारका रूपमा ६१ हजार ७६७ मतसहित भारी मतान्तरले विजयी भएका बालेन रवि लामिछाने नेतृत्वको राष्ट्रिय स्वतन्त्र पार्टी (रास्वपा)मा प्रवेश गरिसकेका छन्।  २०७९  वैशाखमा सम्पन्न स्थानीय तह निर्वाचनमा नेपाली कांग्रेसकी उम्मेदवार सिर्जना सिंहसँग बालेनको मतान्तरण २३ हजार ४६० र तेस्रोमा रहेका नेकपा एमालेका उम्मेदवार केशव स्थापितसँग २३ हजार ६५० मतको रहेको थियो।

पुराना दलका नेताप्रति नागरिकको वितृष्णाको मतमा उदाएका बालेन त्यसयता युवापुस्तामाझ सदा लोकप्रिय छन्। संघीय सरकारको निरन्तर आलोचना गरेका कारण पनि उल्लेखनीय रूपमा उनले प्रशंसक कमाएका छन्।

बालेन झापा जाँदा पनि सहज जित निकाल्ने गणित रास्वपाको छ। ओलीलाई बालेनले भारी मतान्तरणले पराजित गर्ने निष्कर्ष बालेन टिमको छ।

तर बालेन टिमको निष्कर्ष जति सहज भने उनलाई नहुन सक्ने आँकडाले देखाउँछ।

झापा ५ नेकपा एमालेका अध्यक्ष ओली भारी मतले जितेको क्षेत्र हो। यो २०७९ मंसिरमा भएको प्रतिनिधिसभा निर्वाचनमा ओलीले २८ हजार ७४३ मतान्तरण चुनाव जितेको क्षेत्र हो। ओलीले ५२ हजार ३१९ मतसहित निर्वाचन जित्दा उनका प्रतिस्पर्धी रास्वपाका सुरेश पोखरेलले ११ हजार ७४८ मत प्राप्त गरेका थिए। रास्वपाको त्यो भारी मत, बालेनको लोकप्रियता र एमालेप्रतिको असन्तुष्टीको मत आफ्ना लागि खस्ने अनुमान रास्वपाको छ।