नेपालबाट सबैभन्दा बढी निर्यात हुने भटमासको तेल, ६ महिनामा ५६ अर्बको व्यापार

काठमाडौँः चालू आर्थिक वर्षको पहिलो छ महिनामा नेपालबाट ६५ अर्ब ५६ करोड रुपैयाँ बराबरको खाद्य तेल निर्यात भएको छ। भन्सार विभागका अनुसार पुस मसान्तसम्म ९ खर्ब ३९ अर्ब रुपैयाँ बराबरको कुल वस्तु आयात हुँदा १ खर्ब ४२ अर्ब रुपैयाँ बराबरको वस्तु निर्यात भएको हो।

भन्सार विभागले सार्वजनिक गरेको पछिल्लो छ महिनाको वैदेशिक व्यापार तथ्यांकअनुसार नेपालबाट सबैभन्दा बढी सोयाबिन तेल (भटमासको तेल) निर्यात भएको छ। यस अवधिमा मात्र ५६ अर्ब ८ करोड रुपैयाँ बराबरको सोयाबिन तेल निर्यात गरिएको छ।

त्यसैगरी, दोस्रो स्थानमा सनफ्लावर तेल रहेको छ। पछिल्लो छ महिनामा ४ अर्ब ७८ करोड रुपैयाँ बराबरको सनफ्लावर तेल निर्यात भएको भन्सार विभागले जनाएको छ। सोयाबिन र सनफ्लावर दुवै प्रकारका तेल मुख्यतया भारतमा निर्यात गरिएको हो।

भन्सार विभागका अनुसार यी दुई प्रकारका तेलसँगै अन्य १२ प्रकारका तेलसमेत गरी नेपालबाट कुल ६५ अर्ब ५६ करोड रुपैयाँ बराबरको तेल निर्यात भएको छ।