अमेरिकामा नेपालीलाई सहुलियत सेवा लिन कडाइ, भिसा र ग्रिनकार्ड रद्दसम्मको चेतावनी

काठमाडौँ: संयुक्त राज्य अमेरिकाले त्यहाँस्थित नेपाली नागरिकलाई सहुलियत सेवामा कडाइ गरेको छ।

अध्ययन, भ्रमण, रोजगारी, व्यवसाय तथा परिवार वा आफन्त भेटघाट इत्यादिको सिलसिलामा अमेसरिका पुगेकाहरू अवैधानिक तवरले वा गलत सूचना या विवरण पेस गरी अमेरिकी सरकारले दिँदै आएको सहुलियत पूर्ण सुविधा लिनेमा नेपाली नागरिकहरू माथिल्लो सूचीमा रहेको जनाउँदै त्यसो नगर्न चेतावनी दिएको हो।

अमेरिकाले स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता सहुलियतपूर्ण सुविधामा कडाइ गरेको हो। यस्ता सहुलियतपूर्ण सुविधा वा सहायतामा निर्भर भएमा त्यस्ता व्यक्तिको भिसा र ग्रिनकार्ड नै रद्द हुनसक्ने चेतावनी अमेरिकाले दिएको छ।

विभिन्न प्रयोजनमा अमेरिका गएका नेपालीहरूमध्ये सन् २०२४ मा गएकाहरूको तथ्यांकले मात्रै पनि नेपाली नागरिकहरू अमेरिकी सरकारका सहुलियतपूर्ण सेवा लिनेहरूको माथिल्लो सूचीमा रहेका पाइएको भन्दै नेपालीका लागि हाललाई आप्रवासी भिसा बन्द गरेको अमेरिकाले सार्वजनिक सूचना नै जारी गरेको छ।

यस्तै १ / बी२ भिसामा अमेरिका गएका नेपालीहरू अमेरिकामा ओभरस्टे गरेको र रोजगारी लगायत तोकिएको भन्दा फरक काममा संलग्न भएको भन्दै अमेरिकी सरकारले २१ जनवरी २०२६ देखि गरी बी १ /बी२ भिसा आवेदनमा अमेरिकी डलर ५००० देखी १५००० सम्म धरौटी राख्नुपर्ने प्रावधान नै लागू गरेको थियो।

नेपाल सरकार परराष्ट्र मन्त्रालयले एक सूचना जारी गर्दै अमेरिकामा रहेका नेपालीहरूले सहुलियत सुविधा दुरुपयोग गरेमा यस्ता कार्यले नेपालप्रति अमेरिकी सरकारको भिसा नीति थप प्रभावित हुनसक्ने हुँदा भविष्यमा अमेरिका जान चाहने नेपाली नागरिकलाई अमेरिकी भिसा प्राप्ति अझ कठीन हुन जाने र मुलुकको प्रतिष्ठामा गम्भीर नकारात्मक असर पर्न जाने भन्दै त्यसो नगर्न सूचना जारी गरी अनुरोध गरेको छ।