बैतडी बस दुर्घटनाः मृतक परिवारलाई जनही एक लाख राहत, घाइतेको उपचार खर्च व्यहोर्ने

कैलाली: बैतडीको पुर्चौडी नगरपालिका–७ स्थित बडगाउँ घुम्तीमा बिहीबार भएको जन्ती बोकेको बस दुर्घटनामा ज्यान गुमाएका मृतकका परिवारलाई सुदूरपश्चिम प्रदेश सरकारले जनही एक लाख रुपैयाँ राहत उपलब्ध गराउने निर्णय गरेको छ। मुख्यमन्त्री कमलबहादुर शाहको अध्यक्षतामा शुक्रबार बसेको मन्त्रिपरिषद् बैठकले उक्त मानवीय सहायता प्रदान गर्ने निर्णय गरेको हो।

मन्त्रिपरिषद्ले दुर्घटनामा घाइते भएकाहरूको सरकारी अस्पतालमा उपचार हुँदासम्म लाग्ने सम्पूर्ण खर्च प्रदेश सरकारले व्यहोर्ने निर्णयसमेत गरेको छ।

पवनदूत यातायातको सु–प–प्र–०२–००१ ख १११९ नम्बरको बस पुर्चौडी–७ को भौनीबाट बेहुली लिएर बझाङको सुनकुडातर्फ फर्किने क्रममा करिब २०० मिटर तल खसेर दुर्घटनामा परेको थियो। दुर्घटनामा १३ जनाको मृत्यु भएको जिल्ला प्रहरी कार्यालय बैतडीले जनाएको छ।

प्रहरीका अनुसार ६ जनाको घटनास्थलमै, पाँच जनाको डडेलधुरा अस्पताल लैजाँदै गर्दा र दुई जनाको स्थानीय कोटिला स्वास्थ्य चौकीमा मृत्यु भएको हो। दुर्घटनामा करिब ४० जना घाइते भएका छन्। घाइतेहरूको डडेलधुरा अस्पताल, बझाङको देउलेक स्वास्थ्य केन्द्र तथा स्थानीय स्वास्थ्यचौकीहरूमा उपचार भइरहेको छ भने गम्भीर अवस्थामा रहेका पाँच जनालाई धनगढी रेफर गरिएको छ। बस चालकको उपचार बैतडीको पाटनमा भइरहेको प्रहरीले जनाएको छ।

बेहुला र बेहुली भने अर्को सवारीसाधनमा रहेका कारण सकुशल रहेका छन्। प्रारम्भिक अनुसन्धानका आधारमा बसको प्रेसर पाइप फुट्नुका साथै उकालोमा अत्यधिक भारका कारण दुर्घटना भएको हुन सक्ने अनुमान गरिएको प्रहरीले जनाएको छ।