बागमती, कोसी र मधेसमा मंगलबार रातैभर झरी, आज पनि बर्खा हुने पूर्वानुमान

काठमाडौं– जल तथा मौसम पूर्वानुमान महाशाखाका अनुसार कोसी, बागमती र मधेस प्रदेशमा मंगलबार बेलुकी ६ देखि राती ३ बजेसम्म निरन्तर झरी परेको छ। काठमाडौं उपत्यकासहित देशका विभिन्न स्थानमा रातभरि वर्षा भएको मौसम पूर्वानुमान महाशाखाले बताएको हो।

कोसी, मधेस र बागमती प्रदेशका केही स्थानमा रातभर वर्षा भएको र अहिले पनि कोसी प्रदेश र मधेस प्रदेशका पूर्वी क्षेत्रका थोरै स्थानमा हल्का वर्षा भइरहेको महाशाखाका मौसमविद् वरुण पौडेलले जानकारी दिए। ‘विगत २४ घन्टामा मकवानपुरमा ८० मिलिमिटर र लमजुङमा ७८ मिलिमिटर वर्षा भएको छ’, उनले भने।

काठमाडौं उपत्यकामा पनि रातैभरि पानी परेको छ। मौसमविद् वरुण पौडेलका अनुसार काठमाडौं उपत्यकामा साँझ ६/७ बजे पानी पर्न सुरु भएको थियो। ‘बिहान ३ बजेदेखि रोकियो’, उनले भने, ‘फेरि बेलुकातिर वर्षा हुने सम्भावना छ।’

विगत २४ घन्टामा काठमाडौं उपत्यकामा ४९ मिलिमिटर पानी परेको छ। ५० मिलिमिटरमाथिको वर्षालाई भारी वर्षा भनिन्छ। मौसम पूर्वानुमान महाशाखाका अनुसार आज दिउँसो कोसी, बागमती र गण्डकी प्रदेशका केही स्थान र मधेस प्रदेशलगायत बाँकी पहाडी भेगका थोरै ठाउँमा मेघ गर्जन/चट्याङसहित हल्कादेखि मध्यमसम्म वर्षा हुने सम्भावना छ।

बुधबार राती पनि कोशी प्रदेशलगायत बागमती र गण्डकी प्रदेशका पहाडी क्षेत्रका केही स्थानमा मेघ गर्जन/चट्याङसहित हल्कादेखि मध्यम वर्षाको सम्भावना छ। मधेस प्रदेशलगायत बाँकी पहाडी भेगका एक/दुई ठाउँमा मेघ गर्जन/चट्याङसहित क्षणिक वा हल्का वर्षाको सम्भावना छ।

मौसम बदली र वर्षा भइरहेकाले देशका धेरैजसो स्थानमा तापक्रम घटेर गर्मी कम भएको छ। कोसी, मधेस, बागमती र गण्डकी प्रदेश तथा देशका बाँकी पहाडी भेगमा तापक्रम घटेको छ।

‘४० डिग्रीभन्दा माथि पुगेको विराटनगरको अधिकतम तापक्रम अहिले ३५/३६ मा झरेको छ’, उनले भने। सुदूरपश्चिम, लुम्बिनी र गण्डकीका तराई क्षेत्रमा भने अहिले पनि तापक्रम यथावत् रहेको उनको भनाइ छ।