चटाइदेखि चोकचौतारीसम्म घुलमिल हुन सक्छु, प्राइभेट जेटले पनि महत्व राख्दैन: विनोद चौधरी

काठमाडौँ: नवलपरासी निर्वाचन क्षेत्र नम्बर १ का उम्मेदवार विनोद चौधरीले आफू सामुदायिक स्कुलमा पढेर विद्यार्थी जीवन सुरु गरेको स्मरण गर्दै यहाँका नागरिकसँग घुलमिल हुन कुनै हीनताबोध नरहेको बताएका छन्। बर्दघाट नगरपालिका–७ जिमिरेभारमा आयोजित कोणसभामा उनले अघिल्लो निर्वाचनको परिस्थितिलाई स्मरण गर्दै आफूमाथि लगाइएका निराधार आरोपहरूलाई जनताको विश्वासले परिवर्तन गरिदिएको बताए।

तत्कालीन समयमा आफूलाई विभिन्न संज्ञा दिइएकोले कठिन मोडमा समेत जनताको साथले आफू निर्वाचित भएको उनले बताए। सोही कारण केही विकृत मानसिकताले लगाएका निराधार आरोपहरू चिर्न आफू सफल भएको उनले बताए।

‘म चटाइमा बसेको छु, खटियामा बसेको छु, चोक–चौतारीमा बसेको छु। जस्तोसुकै परिस्थितिमा पनि म घुलमिल हुन सक्छु भन्ने मलाई लाग्छ। यी कुराका अघि प्राइभेट जेटले पनि महत्व राख्दैनन्। म अझै पनि भूइँमै त्यतिकै सन्तुष्टिका साथ बस्न सक्छु,’ उनले भने।